ШҲТнинг саммити доирасида халқаро кўргазма очилиш маросими бўлиб ўтди.
Тадбирни Туризм ва маданий мерос вазири Азиз Абдуҳакимов очиб берган.
Бу ҳақда вазирлик хабарида сўз боради.
"Пленерга ташриф буюрган ва ўзларининг ажойиб асарларини яратган барча рассом ижодкорларга миннатдоргимни билдирмоқчиман. Шавкат Мирзиёев ташаббуси билан ўтказилаётган бундай тадбирлар Самарқанд руҳиятини мужассамлаштиришга қаратилган",-деган Ўзбекистон Бош вазири ўринбосари.
У сўзида давом этаркан мазкур тадбир иштирокчилари том маънода тарихда қолишларини билдирган.
"Самарқанд шаҳри уч минг йиллик тарихга эга. Ишонаманки, бугунги тадбирда иштирок этаётган ижодкорларимиз ҳам ўз асарлари билан тарихда қоладилар", — таъкидлаган Абдуҳакимов.
Маълумотларга кўра, ташкил этилган тасвирий санъат кўргазмаси умумий кўргазма экспозицияси Шанхай Ҳамкорлик Ташкилотига аъзо давлатлардан ташриф буюрган ижодкор рассомларнинг шахсий ранг-тасвир асарларидан яратилган.
Ижод намуналари Самарқанд шаҳрида ШҲТга аъзо давлатларнинг навбатдаги Саммити ўтказиладиган бинода рассомлар олиб келган шахсий ранг-тасвир асарлар ва пленер давомида ишланган энг сара асарлар билан бирга юқори мартабали меҳмонларга намойиш этилиши режалаштирилгани айтилади.
Эслатиб ўтамиз, кўргазманинг очилиш маросимида ижодкорларга сертификатлар топширилган ва қалам ҳақи ҳам тақдим этилган.
