Адлия вазирлиги Матбуот хизматининг Darakchi.uz'га маълум қилишича, бугун вазирлик томонидан ташкиллаштирилган “Тадбиркорлик кодекси – тадбиркор манфаатлари учун” мавзусидаги халқаро конференция бўлиб ўтмоқда.
Маълум қилинишича, ушбу халқаро конференцияда Адлия вазирлиги, Олий Мажлис палаталари, Президент Администрaцияси, Вазирлар Маҳкамаси, вазирлик ва идоралар, Бизнес-омбудсман, Савдо-саноат палатаси, 20 дан ортиқ халқаро ва миллий экспертлар, илмий ҳамжамият, 100 дан ортиқ ўрта ва йирик бизнес вакиллари иштирок этмоқда.
Тадбир аввалида сўзга чиққан вазир ўринбосари Алишер Каримов тадбиркорлик кодекси лойиҳасининг тайёрланиш жараёни, унинг вазифалари ва келажакда ундан кўзланган мақсад ҳақида гапирар экан, қуйидагиларни баён этди:
"Шуни алоҳида таъкидлашни истардимки, Тадбиркорлик кодекси лойиҳасини ишлаб чиқишга 3 йилга яқин вақт сарфланди. Лойиҳани ишлаб чиқишда нафақат миллий экспертларимиз, балки халқаро экспертлар ҳам жалб қилинди. Асосийси лойиҳа охирги 4-5 ойдан буён жамоатчилик муҳокамасидан ўтказилмоқда.
Айнан тадбиркорларнинг таклифлари, уларни қийнаб келаётган тизимли муаммоларни ўрганиш учун республика даражасида ишчи гуруҳлар ташкил этилиб, республикамизнинг барча ҳудудларида тадбиркорлар билан Кодекс лойиҳаси муҳокама қилинди.
Жамоатчилик, тадбиркорлар ва соҳа экспертлари билан ўтказилган муҳокамалар натижасида 1500 га яқин таклифлар келиб тушди ҳамда лойиҳада коррупциявий омилларнинг мавжудлиги, гендер тенгликка таъсири ва бошқа масалалар бўйича ўтказилган сўровномаларда 1200 дан ортиқ фуқаролар иштирок этишди.
Келиб тушаётган таклифлар асосан, тадбиркорликни қўллаб-қувватлаш, кредит ажратиш, текширувлар, солиқ соҳасида берилган.
Бундан ташқари, Кодекс лойиҳаси 8 та етакчи халқаро ташкилотларга, жумладан, USAID, Жаҳон банки, Осиё тараққиёт банки, Европа ва тикланиш тараққиёт банки, Халқаро молия корпорацияси, Германиянинг “Berlin Economics” иқтисодий гуруҳи, Иқтисодий ҳамкорлик ва тараққиёт ташкилотига тақдим этилган бўлиб, ушбу ташкилотлардан экспертиза натижалари бўйича хулоса ва таклифлар келиб тушмоқда.
Бугунги кунда ушбу таклифлар асосида Тадбиркорлик кодекси лойиҳаси мутахассислар томонидан ўз маромига етказилмоқда.
Ушбу Кодекс тадбиркорнинг қўлида ягона компакт ҳуқуқий меъёрлар тўпламига айланиб, ҳар доим тадбиркорнинг ёнида юрадиган ҳужжат бўлади."
Ҳозирда ушбу конференция халқаро миқёсда ўз ишини давом эттирмоқда.
Тадбирнинг энг муҳим жиҳатларини ёритишда давом этамиз.
