ШҲТнинг Самарқанд саммитига ташриф буюрган Беларусь президенти Александр Лукашенконинг Умка лақабли ити ҳам Ўзбекистонга келди. У айни пайтда Самарқанддаги Туризм марказида Беларусь делегацияси билан бирга “Абадий шаҳар” мажмуасини айланмоқда.
Умка нафақат беларусь халқи орасида, балки, жаҳон сиёсий майдонида ҳам таниш. Сабаби Умка Лукашенко билан бирга 2021 йилнинг 10-16 сентябрь кунлари бўлиб ўтган “Запад-2021” машғулотларида иштирок этган. Кейинчалик интернетда Беларусь раҳбарининг итини хизмат итлари тишлаб олгани ҳақида миш-мишлар ҳам пайдо бўлган.
Бироқ 16 сентябрь куни Беларусь президенти матбуот хизматига яқин “Пул Первого” Телеграм канали Тожикистон пойтахти Душанбе шаҳрига келган кучукнинг суратини чоп этди. Интернетда жойлаштирилган суратда Умка Тожикистон президенти Эмомали Раҳмон қароргоҳидаги стол устида ётганини кўриш мумкин.
"Умка қуёшли Душанбедан барчага салом йўллайди", - дейилади пост сарлавҳасида.
Кучукнинг қанчалик машҳур ва эъзоздалигини мазкур Телеграм каналида у ҳақда 15 маротаба ёритилганидан ҳам билиш мумкин.
Шу йилнинг июнь ойида Умка Беларусдаги ўрим-йиғим байрамида ҳам ўз эгасига ҳамроҳлик қилган. Кадрларда унинг стол устида бемалол ётганини кўриш мумкин. Интернет фойдаланувчилари итни овқат столига қўйиш қарори гигиена қоидаларига зид, шунингдек, йиғилган меҳмонларга нисбатан ҳурматсизлик деб ҳисоблаб, бу ҳаракатни қоралашган.
Эслатиб ўтамиз, Александр Лукашенко ҳайвонларни яхши кўради, буни ўзи ҳам бир неча бор таъкидлаган. Унинг фермасида отлар ва сигирлар, эчки ва қўйлар, қушлар ва мушуклар яшайди. Август ойида Беларусь президентига қуён Рижик совға қилинган.
Сардорбек Раҳмонқулов
