18 сентябрь, якшанба куни Тайван қирғоқлари яқинида кучли зилзила рўй берди.
Унинг Рихтер шкаласи 7,2 ни ташкил этди. Бу ҳақда Тайван марказий об-ҳаво бюроси хабар берган.
Зилзила эпицентри Тайтунг округи мериясидан 42,7 км шимолда жойлашган. Минтақада цунами хавфи эълон қилинди.
Зилзила силкинишлари яна учта давлатда – Япония, Филиппин ва Хитойда сезилган.
Қурбонлар бор-йўқлиги ҳозирча номаълум. Шу билан бирга, Тайван тезюрар темир йўли ярим орол бўйлаб поездлар ҳаракати тўхтатилганини эълон қилди. Метролар ҳам вақтинчалик тўхтатилди.
Ижтимоий тармоқларда воқеа гувоҳларининг воқеа оқибатлари акс этган видеолари тарқалди. Уларда поездларнинг релсларда чайқалиб кетгани, айрим турар-жой бинолари қулаб тушгани акс этганлигини кўриш мумкин.
Шу муносабат билан Япониянинг Миякожима оролида цунами хавфи эълон қилинди.
Оқибатларни бартараф этиш учун воқеа жойига фавқулодда хизматлар етиб келган.
