"Ямал" авиакомпанияси Самарқанд ва Москва ўртрасида тўғридан-тўғри рейсларни йўлга қўйди. Бу ҳақда “Uzbekistan Airports” хабар берди.
Маълум қилинишича, 20 сентябрь куни Самарқанд халқаро аэропорти Россиянинг "Ямал" авиаташувчисининг биринчи йўловчи рейсини қабул қилди.
Москвадан (Домодедово) Airbus A321 самолёти Самарқанд аэропортига келиб қўнди ва у тантанали равишда сув аркаси билан кутиб олинди.
"Ямал" авиакомпаниясининг Москва – Самарқанд – Москва йўналиши бўйича чартер рейслари ҳафтада бир марта сешанба кунлари амалга оширилади. Самарқанддан учиш эса маҳаллий вақт билан соат 08:00 да амалга оширилади.
Шунингдек, "ИрАэро" авиакомпанияси Самарқанддан Қозонга парвозларни бошлади. Яъни, Россиянинг "ИрАэро" авиакомпанияси "Самарқанд" халқаро аэропортидан Татаристон пойтахти — Қозон шаҳрига янги йўналиш очди.
20 сентябрдан бошлаб Самарқандга ва ортга рейслар ҳафтада бир марта сешанба кунлари амалга оширилади. Октябрь ойи охиригача 2022 йил баҳор-ёз мавсуми доирасида самолётлар Самарқанддан Қозонга маҳаллий вақт билан соат 18:30да парвоз қилади.
Йўловчиларни ташиш Sukhoi Superjet 100 самолётларида амалга оширилади. Бир йўналишдаги парвоз вақти 3 соат 40 минут.
Эслатиб ўтамиз, сал аввал Россиянинг "Ямал" авиакомпанияси Наманганга ҳам парвозларни бошлади.
