Тошкент вилояти Оҳангарон туманида укасини ўлдириб, жасадини яшириш мақсадида ёқиб юборган эркак 18 йилга озодликдан маҳрум қилинди. Darakchi.uz суд ҳужжатлари билан танишди.
Аниқланишича, 1990 йилда туғилган эркак 1998 йилда туғилган укаси билан Оҳангарон туманидаги хонадонлардан бирида яшаган. 2026 йил январь ойида ака-ука ўртасида келишмовчилик юзага келган.
Воқеа куни спиртли ичимлик истеъмол қилган укаси автомобиль сотиб олмоқчи эканини айтиб, телефонидан машина расмини кўрсатган. Акаси унга аввал Мажбурий ижро бюросидаги қарзини тўлаши кераклигини, шунингдек, ҳайдовчилик ҳуқуқидан маҳрум қилинган ҳолда машинани қандай бошқаришини ўйлаб кўриши лозимлигини айтган.
Шундан сўнг укасининг кўрсатмасига кўра икки шиша коньяк ва энергетик ичимликлар олиб келинган. Укаси ярим соат ичида бир шиша коньякни ичиб бўлганидан кейин уй кимга тегишли эканини сўраб, акаси ва унинг турмуш ўртоғидан хонадонни тарк этишни талаб қилган.
Судланувчининг кўрсатмасида айтилишича, укаси ўзини “кўча боласи” деб атаб, акаси ва унинг турмуш ўртоғини ҳақорат қилган. Шунингдек, у “102” рақамига қўнғироқ қилиб, акаси ва унинг хотинини уйдан чиқариб юборишини айтган.
Шундан сўнг ака ошхона пичоғи билан маст ҳолдаги укасининг бўйнига уч марта зарба берган. Оқибатда жабрланувчи кўп қон йўқотиб, воқеа жойида вафот этган.
Қотилликдан кейин эркак жиноятни яширишга уринган. У жасадни кўрпага ўраб, ҳовлида ҳожатхона учун қазилган чуқурга судраб олиб борган. Кейин жасад устидан бензин қуйиб, ёқиб юборган.
Орадан тахминан икки соат ўтгач, чуқурдан ҳануз тутун чиқаётганини кўрган. Шундан сўнг у уйни таъмирлаш учун олиб келинган икки қоп цементни жасад устидан тўкиб, чуқурни қум билан кўмиб қўйган.
Эртаси куни у синглисига укаси уйдан чиқиб кетгани ва қайтиб келмаганини айтган. Укасидан дарак бўлмагач, синглиси 23 январь куни ички ишлар органларига мурожаат қилган.
Хонадонга ҳуқуқни муҳофаза қилувчи органлар ходимлари келиб, чуқур устидаги тупроққа эътибор қаратган. А.Б. эса ушбу чуқур анча йилдан бери борлиги ва ундан чиқиндиларни ёқиш учун фойдаланишини айтган.
Бироқ ходимлар кетгач, А.Б. шубҳа остида қолганини англаб, жасадни бошқа жойга кўчиришга қарор қилган.
У 24 январдан 25 январга ўтар кечаси жасадни чуқурдан қайта қазиб олишга уринган. Аммо уни бутунлай чиқара олмагач, болта ёрдамида марҳумнинг икки оёғи ва чап қўлини танасидан ажратган.
Икки оёқ ва чап қўлни хонадондан 400 метр узоқликдаги тошлар орасига яширган. Бош ва тана қисмларини эса сой қирғоғига кўмиб юборган.
Россиядан қайтиб келган онаси кенжа ўғлининг қаердалигини сўраганида, А.Б. дастлаб уни алдаган. Кейинчалик эса қотилликни тан олган. Онаси ундан ҳуқуқ-тартибот идораларига бориб таслим бўлишини талаб қилган.
Бироқ А.Б. қамалишдан қўрқиб, турмуш ўртоғи билан автобусда Тошкентдан Навоий вилоятига кетган. Ўша куни кечқурун ички ишлар органлари ходимлари уни топиб, Оҳангарон тумани ички ишлар бўлимига олиб келган.
4 февраль куни у жиноятни бўйнига олган ва жасад қисмлари яширилган жойларни кўрсатган.
Суд-тиббий экспертизаси жасадни бўлаклаш ва куйдириш билан боғлиқ жароҳатлар марҳум вафот этганидан кейин етказилганини тасдиқлаган. ДНК экспертизаси эса топилган қолдиқлар судланувчининг укасига тегишли эканини 99,9 фоиз аниқлик билан кўрсатган.
Жиноят ишлари бўйича Оҳангарон шаҳар суди ҳукмига кўра, А.Б. Жиноят кодексининг 97-моддаси 2-қисми “в” ва “ж” бандлари ҳамда 134-моддасида назарда тутилган жиноятларни содир этганликда айбдор деб топилган.
Унга нисбатан узил-кесил 18 йил муддатга озодликдан маҳрум қилиш жазоси тайинланган.
