Самарқанд шаҳрида солиқ ва божхона сиёсатидаги ислоҳатлар мавзусида ҳалқаро давра суҳбати бўлиб ўтмоқда, дея хабар қилди Давлат солиқ қўмитаси матбуот хизмати.
Қайд этилишича, тадбир давомида мутахассислар ҚҚС бўйича солиқ имтиёзларини бериш амалиётидан воз кечиш кўриб чиқилаётганлигини таъкидладилар, чунки уларни қўллаш натижасида дастлаб қўйилган мақсадга эришилмайди.
Амалиёт шуни кўрсатадики, охирги истеъмолчилар оладиган товарлар ва хизматлар нархи пасаймайди ва натижада ушбу чора-тадбирлар аҳолининг тўлов қобилиятига таъсир қилмайди ва натижада кўпроқ товарлар ва хизматларни истеъмол қиладиган бадавлат одамлар фойда кўришади.
Ўзбекистондаги мутахассислар ижтимоий ёрдамга муҳтож шахсларга тўланган солиқни қайтариш орқали ҚҚСни прогрессив қилиш таклифини кўриб чиқмоқдалар.
Иштирокчи мамлакатлардаги ҳамкасбларимиз ушбу соҳадаги тажрибалари билан ўртоқлашдилар.
Масалан, Озарбайжонда ҚҚС бўйича кешбэк тақдим этилади:
- нақд пул билан тўлайдиганлар учун-10%;
- нақд пулсиз ҳисоб-китоб билан-15%.
Ушбу чора-тадбирлар истеъмолчилар орасида катта шуҳрат қозонган ва натижада савдо шохобчалари айланмаси 4 баравар ошди.
