Бугун, 11 октябрь куни соат 05:45 да А-373 “Тошкент-Ўш” халқаро автомобил йўлининг “Қамчиқ” довони қисмида “Водий-Тошкент” йўналишида ҳаракатланиб кетаётган “ВОЛВО” русумли юк машинаси ҳайдовчиси кутилмаганда бошқарувни йўқотиб, қарама-қарши йўналишга чиқиб кетган ва 5 тонналик ҳамда 8 тонналик “ИСУЗУ” юк машиналари билан тўқнашган. Йўл-транспорт ҳодиссаси оқибатида 8 тонналик “ИСУЗУ” юк машинасида ёнғин келиб чиққан. Бу ҳақда ФВВ матбуот хизмати хабар бермоқда
Воқеа жойига ФВВининг "Қамчиқ" Махсус қидирув, ёнғин-қутқарув бошқармаси қутқарувчилари ва ЙПХ ходимлари етиб борган. Қутқарувчилар махсус асбоб-анжомлар ва техникалар ёрдамида ёнаётган машинани соат 06:07 да ўчиришган. Шунингдек, ҳодиса оқибатларини бартараф этишга Фавқулодда вазиятлар давлат қуйи тизимига кирувчи ташкилотлар куч-воситалари ҳам жалб этилган.
Қутқарувчилар томонидан воқеа жойида жабрланган 3 нафар юк машиналари ҳайдовчиларига биринчи тиббий ёрдам кўрсатилиб, малакали тиббий ёрдам кўрсатиш учун шифохонага юборилган. Ҳодиса оқибатида халок бўлганлар йўқ.
