Рашк, нафс ёхуд таблеткалар... Тошкентда 4 кишини ваҳшийларча пичоқлаб ташлаган эркак суд олдида жавоб берди (фото)

ЖИНОЯТ 23.11.2022, 00:32
Рашк, нафс ёхуд таблеткалар... Тошкентда 4 кишини ваҳшийларча пичоқлаб ташлаган эркак суд олдида жавоб берди (фото)

Бундан 4 ой аввал бир оиланинг 4 нафар аъзоси — аёл, қайнона, қайниопа ва 7 ёшли ўғил биргина пичоқ туфайли ҳаётдан кўз юмиши мумкин эди. 

Гап шундаки, 1989 йилда туғилган судланувчи уларни қасддан ўлдириб, ўч олиш мақсадида режа тузади.

Бугун Жиноят ишлари бўйича Чилонзор туман судида ана шундай даҳшатли жараёнларни амалга оширган шахсга суд ҳукми ўқилди.

Хўш, вазиятга нима сабаб бўлган эди? Нега у бундай режа тузди? Қандай қилиб ота ўз фарзандига пичоқ санчди?

"Darakchi.uz" айни саволларга жавоб олиш мақсадида очиқ суд мажлисида иштирок этиб, судланувчи ҳамда жабрланганлар билан суҳбатлашди.

Маълум бўлишича, судланувчи 2013 йил 1994 й.т. қиз билан қонуний никоҳдан ўтиб, ўзаро турмуш давомида 2 нафар фарзандли бўлишади. У спиртли ичимликлар ва психотроп моддалар истеъмолига ружу қўйиб, ҳаёт кечиради.

Жиноятчи шу давр мобайнида аёлининг опасига бир неча бор шилқимлик қилиб, уни шаърий никоҳига олишни таклиф қилган.

"Хўжайиним билан яшаётган пайтимда тегажонлик қилган. Менга турмушга чиқасанми, иккинчи хотинликка никоҳимга олмоқчиман, деб икки марта айтган. Йўқ деганман" — дейди  судланувчи қайниопаси маълум муддат аввал бўлиб ўтган вазиятни эслаб.

Бироқ бундай таклифларга кўнмаган опа синглисига бор гапни айта олмаган. Аммо сингил узоқ вақт оилани сақлаб қолиш учун яшириб келинган вазиятдан барибир хабар топган.

Шундан сўнг у 2 нафар вояга етмаган фарзандлари билан ўзининг ота-онаси яшайдиган хонадонга кетиб қолган.

Қалтис жараёнлар айни шу нуқтадан бошланиб кетган. Судланувчи аёли ҳамда вояга етмаган икки фарзандини таъқиб қилиб, 20.05.2022 йил хонадонга бориб, аёли ва унинг оила аъзоларини тинчлигини бузади. 

Турмуш ўртоғини турли номақбул сўзлар билан ҳақоратлаб, уриб енгил тан жароҳатлари етказиб, ҳуқуқбузарлик содир этгани сабабли, унга нисбатан жиноят ишлари бўйича Чилонзор туман судининг 03.06.2022 йилдаги қарорига асосан жарима жазоси қўлланилган. 

Бироқ бундан ҳам тўғри хулоса чиқармаган судланувчи ҳаракатларини давом эттиришга уринади. 

"Ўша куни рашк қилиб, озгина жанжаллашиб, пиво ичгандим. Ажрашаман, деб туриб олди, жахлим чиқиб кетди. Уйдан пичоқни олиб, қайнонамни уйига бордим. Ўша пайт тортишиб кетдик, пичоқ урдим. Кейин нима бўлди, эслай олмайман",— дейди судланувчи.

Суд-тиббий экспертизасининг хулосасида аёлининг танасида “Кўкрак ва қорин қўшма жароҳати, кўкрак қафаси ўнг яримини, ўнг ўпкани жароҳатланиши билан кечган тешиб ўтувчи санчиб-кесилган яраси, кўкрак қафаси чап томони тешиб ўтмаган санчиб-кесилган яраси, қорин олд юзасини кўплаб санчиб кесувчи, ингичка ичак тутқичини жароҳатлаган санчиб-кесилган яралари, ўнг ўмров ости сохаси санчилган-кесилган яралари” каби тан жароҳатлари аниқланганлиги кўрсатилган.

Шу вақтда хонадонда бўлган жиноятчининг 1967 й.т. қайнонаси жанжални тўхтатиш ва қизининг ҳаётини сақлаб қолиш мақсадида уларнинг олдига югуриб келганида, судланувчи қайнонасига фаол қаршилик кўрсатиб, уни ҳам қасддан ўлдириш мақсадида қўлида бўлган ошхона пичоғи билан танасининг турли қисмларига бир неча марта тан жароҳатлари етказган.

Суд-тиббий экспертизасининг хулосасида қайнонанинг танасида “Кўкрак қафаси чап томони кўкрак бўшлиғига кириб, чап ўнгач пастки бўлагини жарохатлаган, кўкрак қафаси ўнг томони орқа юзаси кўкрак бўшлиғига тешиб кирмаган ва чап кўкрак бези ташқи ярмидаги санчилган-кесилган яралари, ўнг елка сохасида 2 та, чап тирсак бўғинида 1 та, чап билак соҳасида 2 та, ўнг қўл 1-бармоқ асос сохасида, ўнг кафт ички юзаси 2 ва 3-бармоқлар орасидаги бармоқлараро бўлиққа, 3-бармоқ асос фалангаси ташқи ён юзасига, 3-бармоқ ўрта фалангаси ташқи юзасига ўтиши билан кечган санчилган-кесилган яралари” каби тан жароҳатлари аниқлангани кўрсатилган.

Жанжал ва шовқин овозини эшитиб, бошқа хонадан чиқиб қолган аёл (судланувчининг қайниопаси)  судланувчини тўхтатиш учун хонадонда бўлган вентилятор билан урган вақтида, судланувчи унга фаол қаршилик кўрсатиб, оилавий мажаролар сабабчиси сифатида уни ҳам қасддан ўлдириш мақсадида қўлидаги ошхона пичоғи билан қайниопасининг танасини қорин ва елка қисмларига бир неча маротаба санчиб олган.

Суд-тиббий экспертизасида қайниопанинг танасида “Қорин олд девори қорин бўшлиғига тешиб кириб, жигар чап бўлагини тешиб ўтиб, ошқозон ости бези бошчаси капсуласини жарохатланиши билан кечган санчилган-кесилган яраси, ўнг қўлтиқ ости соҳасини тешиб ўтган, кўкрак бўшлиғига кирмаган, мушакларни жарохатланиши билан кечган 2 та санчилган-кесилган яралари” каби тан жароҳатлари аниқланган.

Пичоқ билан қуролланган, оила аъзоларининг аҳволига гувоҳ бўлган вояга етмаган ўғил отасини тўхтатиш учун унинг ёнига борганида, маст ота ўғлига ҳам жароҳат етказган.

"Ўчиб колган эдим, нима бўлди, эслай олмайман. Орада фарзандим ўртамизга тушиб қолди. Қайси ота ўғлига пичоқ уради? Қаттиқ пушаймонман"— дейди судланувчи.

Суд-тиббий экспертизасининг хулосасида судланувчининг ўғли танасида “Чап томонлама кўкрак қафасидан қорин бўшлиғига ўтувчи санчиб-кесилган очиқ жароҳати, диафрагма, талоқ ва ингичка ичакни жароҳати” каби тан жароҳатлари аниқланганлиги кўрсатилган.

Судланувчи ЖКнинг 25,97-моддаси (қасддан одам ўлдиришга суиқасд) 2-қисми “а,в,г,ж” бандлари, 219-моддаси (ҳокимият вакилига ёки фуқаровий бурчини бажараётган шахсга қаршилик кўрсатиш) 2-қисмида назарда тутилган жиноятларни содир этганликда айбдор деб топилиб, узил-кесил ўташ учун 17 йил муддатга озодликдан маҳрум қилинди.

Шарҳлар

Об-ҳаво: Тошкент
+0.97° ҳаво очиқ
Валюта курси
11203.13
USD -9.84
11604.20
EUR -18.04
183.91
RUB 0.29
1