Туркия мамлакат шимоли-шарқидаги Габар тоғи ҳудудида янги нефт конини топди. Бу ҳақда Президент Ражаб Тоййиб Эрдўғон республика Вазирлар Маҳкамаси йиғилиши якунлари бўйича телемурожаатида айтиб ўтди.
Унинг сўзларига кўра, очилган нефть захираларининг соф ҳажми 150 миллион баррелни ташкил этади.
Давлат раҳбарининг айтишича, захираларнинг қиймати қарийб 12 миллиард долларга баҳоланмоқда.
“Бу 2022 йилда қуруқликда топилган энг йирик 10 та кондан биридир”, — деди Туркия раҳбари.
Унинг қўшимча қилишича, нефть сифати жуда юқори бўлган минтақадаги тўртта қудуқдан кунига 5 минг баррел нефть ишлаб чиқарилмоқда.
Эрдўғон Туркиянинг миллий нефть компанияси Туркия Петроллерининг 5 йил аввал тахминан 40 минг баррел бўлган кунлик ишлаб чиқариши бугунги кунда 65 минг баррелга кўтарилганини айтди.
Унинг сўзларига кўра, Туркия ҳукумати қўшимча сейсмик тадқиқотлар, бурғулаш ишларини кўпайтириш ва ҳосилдорликни ошириш усулларини жорий этиш орқали Туркия Республикасининг юз йиллигига қадар кунлик нефт қазиб олиш ҳажмини 100 минг баррелга етказишни режалаштирмоқда.
“Пандемия даврида кўплаб нефть ва газ компаниялари таслим бўлган бўлса-да, Туркия Петроллери қидирув ва қазиб олиш фаолиятини тезлаштирди. Биргина 2021 йилнинг ўзида яна 34 та кон очилди ва биз ҳозирги захираларимизга яна 71 миллион баррел қўшдик”, — деди Президент Эрдўған.
Президент Эрдўған Туркиянинг террорга қарши курашига ҳам тўхталди.
У Анқаранинг мамлакат чегараларини террорчилик таҳдидидан ҳимоя қилиш қатъиятини яна бир бор таъкидлади.
“Туркия ўз чегараларида хавфсизлик чизиғини яратишни якунлаб, ўзига қарши қаратилган маккор ва ғайриоддий режаларни яна бир бор барбод қилади”, —деди президент шу муносабат билан.
