"Ҳакамлар финалда икки марта “очко”ларимни олиб ташлашди". Осиё чемпионатида 24 та медаль билан қайтган спортчилар кутиб олинди ва мусобақа ҳақидаги фикрларини билдирди(видео)

Жорий йилнинг 17-18 декабрь кунлари Таиланднинг Банкок шаҳрида Кикбоксинг спорт тури бўйича Осиё чемпионати бўлиб ўтди. Унда 18 та давлатдан 379 нафар спортчи қатнашди.

Жумладан, мамлакатимиздан 22 нафар спортчи кикбоксингнинг 27 та йўналиши бўйича курашиб, умумий ҳисобда 24 та медалга эга чиқди.

Бундан ташқари, уч нафар кикбоксингчи келаси йил Ар-Риёдда бўлиб ўтадиган Жанг санъати жаҳон ўйинларига йўлланма учун мусобақада ғолибликни қўлга киритишди.

Бугун, Тошкент халқаро аэропортида мутасадди идораларнинг масъул ходимлари, кенг жамоатчилик ва ОАВ вакиллари иштирокида Осиё чемпионати совриндорлари кутиб олинди.

"Таиландда жуда нуфузи баланд мусобақада иштирок этиб қайтдик. Бу мусобақа кейинги йил бўлиб ўтадиган  Жаҳон ўйинларига йўлланма беради.  Бу мусобақада 22 спортчи қатнашиб, 24 медаль олишди. Ундан 10 таси олтин, 9 таси кумуш, 5 таси бронза”, — дейди мураббий Ойбек Аметов.

"Жанглар борган сари қийинлашиб борди. Меҳнатимга ярашасини олдим деб ўйлайман. Биринчи рақибим вьетнамлик, иккинчиси қозоғистонлик, финалда эса Камбоджа давлатидан келган спортчи билан тўқнаш келдим ва олтин медаль соҳиби бўлдим", — дейди мусобақа ғолиби бўлган спортчимиз.

"Энг қийин рақиб финалдадаги қозоғистонлик рақибим бўлди. “Судья”лар икки марта “очко”ларимни олиб ташлашди. Лекин барибир курашиб, биринчи ўринни олдик", — дейди яна бир шохсупанинг энг юқорисидан ўрин олган спорчимиз.

Ойбек Шукуров