Ўтган 2022 йилда мансабдор шахслар томонидан тадбиркорларнинг қонуний фаолият юритишига тўсқинлик қилиш ҳамда уларнинг ҳуқуқ ва манфаатларини қўпол бузиши билан боғлиқ 288 та ҳуқуқбузарлик фош этилди. Бу ҳақда Бош прокуратура ҳузуридаги Департамент Матбуот хизмати "Darakchi.uz"га маълум қилди.
Хусусан, Бош прокуратура ҳузуридаги Департамент томонидан давлат ва бошқарув органларининг 28 нафар, тижорат банкларининг 40 нафар, коммунал хизмат кўрсатиш корхоналарининг 18 нафар, назорат органларининг 10 нафар ва бошқа идораларнинг 192 нафар мансабдор шахсларининг тадбиркорлар манфаатларига қарши қаратилган ҳуқуқбузарлик содир этилишининг олди олиниши таъминланган.
Ўтказилган учрашувлар ҳамда қабуллар давомида 3 860 дан ортиқ тадбиркорнинг муаммолари қонуний тартибда ҳал этилган.
Шунингдек, 36 та тадбиркорлик субъектларига 34,1 млрд сўм кредитлар ажратилишида кўмак берилиб, 14 та ҳолатда электр энергияси, табиий газ ва ичимлик суви тармоқларига уланиш, 102 та ҳолатда рухсатнома ва лицензиялар олиш ҳамда 2 269 та бошқа ҳолатларда амалий ёрдам кўрсатилган.
Норасмий равишда тадбиркорлик билан шуғулланаётган ҳамда рақобат муҳитига салбий таъсир кўрсатаётган 633 нафар шахснинг давлат рўйхатидан ўтказилиши орқали 665 та янги иш ўринлари ташкил этилишига эришилган.
Агар тадбиркорлик фаолиятингизга ноқонуний аралашиш, тўсқинлик қилиш, тамагирлик ёки пора талаб қилиш ҳолатларига дуч келсангиз, Бош прокуратура ҳузуридаги Департаментнинг 71-233-10-07 рақамли ишонч телефони, @departament_antikorbot ёки www.new-department.uz расмий веб-сайти орқали мурожаат қилишингиз мумкин.
