Қирғизистон президенти Садир Жапаров мамлакатнинг барча собиқ президентларини бир музокара столига йиғди. Давлат раҳбарининг 18 февраль куни ўтказган ушбу учрашувидан кўзланган мақсад қирғиз халқини жипслаштириш, мамлакат тараққиётига тўсқинлик қилаётган ички қарама-қаршиликларни бартараф этишдан иборат эканлиги маълум қилинди.
Жапаровнинг матбуот котиби Ербол Султонбоевнинг айтишича, йиғилганлар орасида собиқ президентлар Aсқар Aкаев, Қурманбек Бакиев, Роза Отунбаева, Aлмазбек Aтамбоев ва Сооронбай Жеенбеков ҳам бор. "Маълум сабабларга кўра жой сифатида нейтрал ҳудуд белгиланди", дея қўшимча қилди матбуот котиби. Бишкекдаги манбалар учрашув Дубайда бўлиб ўтганини хабар қилди.
“Евроосиё ҳудудида буюк давлатларни яратган қадимги қирғизларнинг бугунги аҳволи қандай? Бирлик бўлмагани учун, ҳокимият учун кураш туфайли биз қадимий империямиздан айрилиб, Ўрта Осиёнинг бир гўшасида қолиб кетаётгандек бўламиз. Мустақиллигимизни эълон қилган бўлсак ҳам тараққиётимизга нима тўсқинлик қилмоқда? Энди бизда шимол ва жанубга, еттита ҳудудга бўлиниш бор, уларнинг ҳар бири ўзи учун ғамхўрлик қилади. Aфсуски, ҳозир Қирғизистон аҳолиси у ёки бу президент тарафдорларига бўлинган”, — дейди Жапаров.
Садир Жапаровнинг фикрича, ҳар бир президентнинг тарафдорлари, етти вилоят аҳолиси бир йўналишга эътибор қаратиб, сиёсатни тарк етиб, миллат, иқтисод ривожи ҳақида ўйлашлари керак.
“Собиқ президентлар норозиликларини айтиб, камчиликларини тан олишди. Энг муҳими, улар бир-бирларини кечира олишди. Бу менинг мақсадим эди”, — дея қўшимча қилди амалдаги президент.
Мустақил Қирғизистоннинг биринчи президенти Aсқар Aкаев (1991-2005) бўлган. У инқилобдан кейин мамлакатни тарк этиб, Москвага жойлашди. Унинг ўрнига келган Қурманбек Бакиев ҳокимиятда беш йил қолди, 2010 йилдаги инқилобдан кейин у ҳам мамлакатни тарк этиб, Минскда яшай бошлади. Роза Отунбаева бир ярим йил давом этган ўтиш даврининг президенти бўлди. Aлмазбек Aтамбоев (2011-2017) бир нечта жиноятларда айбланиб, 2020 йилда 11 йилга озодликдан маҳрум этилган. 2023 йил февралида суд собиқ президентга нисбатан чиқарилган ҳукмни бекор қилди, шундан сўнг унга даволаниш учун мамлакатни тарк етишга рухсат берилди. Сооронбай Жеенбеков 2020 йилдаги оммавий норозиликлардан сўнг ўз лавозимини эрта тарк этган эди.
