Бош прокуратура ҳузуридаги Департаментнинг Булунғур туман бўлими томонидан ўтказилган терговга қадар текширувда, “Булунғур буюм бозори савдо комплекси” МЧЖдаги талон-торожлик фош этилди. Бу ҳақда Иқтисодий жиноятларга қарши курашиш департаменти хабар берди.
“Булунғур буюм бозори савдо комплекси” МЧЖ бош ҳисобчиси Н.Р. ва бошқалар сохта ҳужжатларни расмийлаштириш орқали ушбу комплекснинг 4 нафар ишчи-ходимлари ва ўзларига ортиқча иш ҳақлари ҳисоблаб, жами 258,3 млн сўмни ўзлаштирганликлари, шунингдек тўғридан-тўғри шартномалар тузиш орқали харид қилинган 35,1 млн сўмлик маҳсулотларни ўз эҳтиёжлари учун сарфлаб юборганликлари аниқланган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.
