Наврўз байрами арафасида Учкўприк туманидаги 39-мактабнинг янги 220 ўринли ўқув биноси фойдаланишга топширилди. Бу ҳақда Фарғона вилояти Мактабгача ва мактаб таълими бошқармаси ахборот хизмати хабар бермоқда.
Бино мактаб битирувчиларининг ташаббуси ва ҳамжиҳатлиги асосида бунёд этилди.
Мактабнинг биноси 1974 йилда 220 ўринга мўлжаллаб қурилган бўлиб, муассасада 438 нафар ўқувчи таъмирталаб синф хоналарида икки навбатда таълим олаётган эди.
Қисқа муддатда таълим маскани учун 220 ўринли янги ўқув биноси қад ростлади. Мавжуд 220 ўринли эски бино ҳам таъмирланди.
Бундан ташқари, 6 та синф хонаси, компютер синфи, замонавий мебел ва ўқув жиҳозлари билан таъминланди.
Ушбу хайрли ишларни амалга оширишга 3 миллиард сўмдан ортиқ маблағ сарфланди.
Янгидан барпо этилган таълим маскани ўқувчилар ва уларнинг устозлари учун ўзига хос совға бўлди.
Бу ерда ўқувчиларнинг билим олиши учун энди барча шароит ва имкониятлар мавжуд.
