Украина, Хитой ва Яқин Шарқдаги АҚШ сиёсати ҳақидаги 100та махфий ҳужжатнинг интернетда тарқалиши ортида Россия турган бўлиши мумкин. Бу ҳақда масала нозиклигини ҳисобга олиб, анонимлик шарти билан гапирган АҚШнинг уч нафар расмийсига таяниб, “Reuters” хабар берди.
Қайд этилишича, ҳужжатларда Россия кучлари қурбонлари сони камайтилганини кўриш мумкин.
“Ижтимоий тармоқларда эълон қилинган ҳужжатлардан бирида айтилишича, Россиянинг 2022 йил 24 февраль куни Украинага бостириб киришидан буён 16-17 минг россиялик ҳалок бўлган. Қўшма Штатлар ҳақиқий кўрсаткич анча юқори, яъни 200 мингга яқин россиялик ҳалок бўлган ва яраланган деб ҳисоблайди”, дейди расмийлар.
Украина кучлари 2022 йил бошида Россиянинг Киевга қилган дастлабки юришини қайтарди ва Москва “махсус ҳарбий операция” деб атайдиган можаро шарқий ва жанубий фронтдаги урушга айланди. Урушнинг иккинчи йилида Киев ва Москва қандай ҳужум уюштириши мумкинлиги ҳақида миш-мишлар кучаймоқда. Ошкор қилинган ҳужжатлар ҳам Киевнинг уруш режалари ҳақида аниқ маълумот бермаслиги мумкин.
АҚШ Адлия вазирлиги Пентагон билан алоқада бўлганини ва махфий ҳужжатларнинг сизиб чиқиши бўйича текширув бошлаганини маълум қилган.
Украина томони эса сизиб чиққан ҳужжатлар “жуда катта ҳажмдаги хаёлий маълумотларни” ўз ичига олади ва у Украинанинг режалаштирилган қарши ҳужумига шубҳа уйғотиш учун Россиянинг дезинформацион операциясининг бир қисми, деб ҳисобламоқда.
“Булар рус разведкаси томонидан оператив ўйинларнинг стандарт элементлари, холос. Ва бундан бошқа ҳеч нарса йўқ”, деган Украина Президентининг маслаҳатчиси Михаил Подоляк.
