Божхона қўмитаси: 3 ойда 31 та жиноят, 44 та маъмурий иш очилган

Таҳлиллар бугунги кунда Ўзбекистонда биргина ноқонуний тамаки маҳсулотларининг миқдори 21.7% га тенглигини кўрсатди. Божхона органлари томонидан эса 2022 йилда 338 та ҳуқуқбузарлик ҳолатларида 19,8 млрд. сўмлик 1 млн 619 минг қути тамаки маҳсулотларини тўхтатиб қолинган. 2023 йил биргина 1 чорагида ушлаб қолинган тамаки маҳсулотлари эса ўтган йилги кўрсаткичга етай, деб қолган. Яъни атиги 3 ой ичида божхоначилар 89 та ҳолатда 13 млрд. сўмлик 853 минг қути сигаретларининг ноқонуний реализациясига чек қўйишган. Хўш, ушлаб қолинаётган ноқонуний маҳсулотларнинг кейинги “тақдири” нима бўлади? Ҳуқуқбузарликни содир этганлар қандай жазоланяпти? Шу каби саволлар билан мутахассисларга мурожаат қилдик. 

Ноқонуний ва қалбаки тамакиларнинг кейинги “тақдири”

Ҳусан ТАНГРИЕВ, Божхона қўмитаси бўлим бош инспектори:

2022 йилда ва 2023 йилнинг ўтган даврида Божхона қўмитаси томонидан кенг жамоатчилик жалб этилиб, 526 минг қутидан зиёд тамаки маҳсулотлари йўқ қилинди. 

Божхона органлари томонидан 2022 йилда 338 та ҳуқуқбузарлик ҳолатларида 19,8 млрд. сўмлик 1 млн 619 минг қути тамаки маҳсулотларини тўхтатиб қолинди.

2023 йил 1 чорагида ушлаб қолинган тамаки маҳсулотлари эса ўтган йилги кўрсаткичига етай деб қолган. Атиги 3 ой ичида божхоначилар  89 та ҳолатда 13 млрд. сўмлик 853 минг қути сигаретларининг ноқонуний реализациясига чек қўйишган.

Тамаки маҳсулотларининг ноқонуний айланмаси юзасидан Божхона органлари томонидан 2022 йилда 85 та ҳолатда жиноят ишлари қўзғатилган, шунингдек, 253 та ҳолатда маъмурий ишлар юритилиб кўриб чиқиш учун судларга юборилган.

2023 йил 1 чорагида эса божхона органлари томонидан 31 та ҳолатда жиноят ишлари қўзғатилган, шунингдек 44 та ҳолатда маъмурий ишлар юритилиб кўриб чиқиш учун судларга юборилган.

Ҳуқуқбузарлар қандай жазоланмоқда?

Дилмурод РАЖАБОЕВ, Адлия вазирлиги масъул ходими:

• Ўзбекистон Республикаси Жиноят кодексининг 186 (прим 1) моддасига кўра, этил спирти, алкоголли ва тамаки маҳсулотларини қонунга хилоф равишда ишлаб чиқариш ёки муомалага киритиш анча миқдорда ёхуд шундай ҳаракатлар учун маъмурий жазо қўлланилганидан кейин содир этилган бўлса, базавий ҳисоблаш миқдорининг икки юз бараваридан тўрт юз бараваригача миқдорда жарима ёки уч йилгача ахлоқ тузатиш ишлари ёки икки йилдан беш йилгача озодликни чеклаш ёхуд беш йилгача озодликдан маҳрум қилиш билан жазоланади.