АҚШнинг собиқ президенти Доналд Трамп Теннесси штатининг Нешвилл шаҳридаги мактабдаги отишмадан кейин ўқитувчиларни қуроллантиришни таклиф қилди.
“Агар ўқитувчиларнинг камида 5 фоизи ўз ихтиёри билан қуролланса ва жиноятчиларга қаршилик кўрсатиш учун қурол ишлатишни ўрганса, мактабдаги отишмалар муаммоси барҳам топади”, - деди Трамп.
“Агар биз Украинага 120 миллиард доллар юборган бўлсак, бу маблағнинг ўндан бир қисмини америкалик болалар ва мактабларни ҳимоя қилиш учун сарфлашимиз мумкин”, — дея қўшимча қилди Трамп.
Маълумот ўрнида, 27 март куни Нешвиллдаги хусусий христиан мактабида отишма содир бўлиб, олти киши — уч нафар катталар ва уч бола, жумладан, таълим муассасаси маъмури, ўқитувчи ва васий ҳалок бўлди. Отишмани мактабнинг собиқ ўқувчиси очган. Яна етти киши оғир, 17 нафари енгил тан жароҳати олди.
2018 йилда ҳам Трамп мактаблардаги ҳужумларнинг олдини олиш учун ўқитувчиларни қуроллантиришни таклиф қилганди. Ўша пайтда мамлакат президенти бўлган Трамп Флоридадаги отишма қурбонлари билан учрашувда АҚШда қурол-яроғ муомаласини тартибга солиш ва текшириш билан боғлиқ муаммоларни имкон қадар тезроқ ҳал қилишга ваъда берганди.
