Аввал хабар берганимиздек, айни пайтда Сирдарё вилояти Гулистон шаҳрида III Халқаро бахшичилик санъати фестивали бўлиб ўтмоқда.
Фестивалда ўттиздан ортиқ давлатдан келган халқаро делегация вакиллари, 17 давлатдан йиғилган санъат усталари жам бўлди.
Darakchi.uz Туркия давлатидан ташриф буюрган Нар Камбер билан суҳбатлашиб, фестивал ҳақидаги фикрларини сўради:
“Ўзбекистонга саломлар. Мен Туркиядан келдим. Фестивалда биринчи марта иштирок этяпман. Ҳақиқатдан ҳам фестивал жуда муваффақиятли ўтяпти. Бу ишни амалга оширганларни табриклайман. Маданиятларнинг бир ерда бўлиши, бирлашиши жуда муҳим. Дунёнинг ҳар тарафидан, 17 мамлакатдан маданият вакилларининг бу ерда бирлашиши маданиятларнинг яшаши учун жуда муҳим. Ташкилотчиларни такроран қутлайман. Мен ҳам фестивал учун бир шеър ёздим. Саҳнада ҳам бироз аввал ўқиб эшиттирдим. Ўзбек дўстларимиз билан оға-ини эканлигимизни, қонимизнинг, жонимизнинг бир эканлигини, айни маданиятга оид эканлигимизни ифода этдим. Чунки бу ер менинг ўз юртим. Анадолуга кетганмиз аммо асл юртимиз бу ер, аждодларимизнинг юрти бу ер, Самарқанддан, Бухородан кетишган. Такроран бу ерга келишдан жуда ҳам завқ олдим.
Ўзбекистонга биринчи марта келяпман. Аммо сўрасанки, яна келасизми? Албатта, сева-сева келаман. Бу ер менинг ўз юртим. Инсон уйига келмайдими?!
Ўзбекистон ривожланаётган бир ўлка. Маданиятга бу қадар эътибор бераётган экан, янада ривожланади. Маданият яшаса ҳамма нарса ўз изига тушади. Иқтисодиёт юксалади. Халқ ҳаёти яхшиланади.
Яна бир бор ташкилитчиларни ва сизни табриклайман”.
