Жиззах вилояти Ғаллаорол туманида аёли ва 5 ёшли фарзандини бўғиб ўлдириб, ёқиб юборган 23 ёшли йигит умрбодга қамалди.
Воқеа тумандаги Заргар қишлоғидан ўтган Тошкент—Термиз автомобиль йўли ёқасидаги қирликда содир бўлган. Қотиллик тўғрисида хабар берилгач, ИИБ ходимлари ҳолат рўй берган жойга келиб, ўрганиш ишларини олиб борган.
Аниқланишича, қотиллик содир этган шахс ўзидан 7 ёш катта бўлган, шаръий никоҳда яшаб келган хотини ҳамда фарзандини аввал ўлдириб, сўнг ёқиб юборган. Бунга аёлнинг хиёнат қилгани сабаб сифатида кўрсатилган.
Ўрганишлар давомида йигит 2000 йилда Бухоро вилояти Ғиждувон туманида туғилгани, 1993 йилда туғилган аёл билан 5 йил аввал танишиб, яширинча шаръий никоҳдан ўтгани, 2017 йилда улар ўғил фарзанд кўргани маълум бўлган. Шунингдек, 2022 йил куз бошида аёл яна ҳомиладор бўлгани, йигит Тошкентга кетган вақтида унинг отасига қўнғироқ қилиб, ҳақиқатни қайнотасига айтиб бергани аниқланган.
Шундан кейин йигит аёлини фарзанди билан Тошкентга чақирган. Аёлининг қўлида кўп миқдорда пул борлигини билган эркак уни хиёнатда айблаб, ўзаро тортишиб қолган. Бир неча кун яшагач, Бухорога қайтмоқчи бўлган. Йўлга чиққач, кечки пайт Жиззах вилояти Ғаллаорол тумани Заргар қишлоғидаги қирликда тушиб қолиб, у ерда 2 соатча гаплашиб ўтирган. Суҳбат давомида гап яна хиёнатга бориб тақалгач, жанжал содир бўлган.
Эркак хотинини аввал қўли билан, сўнг соч қуриткич билан бўғиб ўлдирган. Фарзандини олиб кетмоқчи бўлганда бола онаси билан қолишини айтган, шундан сўнг уни ҳам сумка тасмаси билан бўғиб ўлдирган. У хотини ва фарзандининг жасадини кийимларга қўшиб ёқиб юборган ва Бухорога кетган.
Мазкур ҳолат юзасидан суд жараёни бўлиб ўтди. Унда йигит қилган ишидан пушаймон эканлигини айтиб, барчадан кечирим сўради.
“Қилган ишимдан пушаймонман. Юртбошимиздан, ота-онамдан кечирим сўрайман”, — дея йиғлади у.
Суд ҳукми билан у Жиноят кодексининг 97-моддаси 2-қисми ва 134-моддаси билан айбдор деб топилиб, умрбод озодликдан маҳрум этилди.
