Сурхондарё вилоятининг Узун туманида "Gentra" жарликка тушиб кетиши оқибатида икки киши ҳалок бўлди. Бу ҳақда вилоят ИИБ ЙҲХБ ахборот хизмати хабар бермоқда.
Маълум қилинишича, ҳодиса жорий йил 7 май куни соат 23:30 ларда Узун туманидан ўтувчи 4К-620 автомобиль йўлининг 51-километрида содир бўлган. Денов йўналишидан ҳаракатланиб келаётган Gentra ҳайдовчиси хавфли бурилишларга эътибор бермасдан, чалғиши оқибатида бошқарувни йўқотиб, машина жарликка тушиб кетган.
Автоҳалокатда 1 нафар фуқаро воқеа жойида, яна бир фуқаро эса шифохонада ҳалок бўлган. Қайд этилишича, йўл тоғли ҳудудда жойлашган бўлиб, ҳудудда йўл белгилари етарли даражада ўрнатилган. Йўл четига ҳам тўсиқлар жойлаштирилган, аммо ҳайдовчи ушбу тўсиқлар бўлишига қарамай, етарли даражада қоидага амал қилмагани сабабли жарликка қулаб кетган.
