Белгиланган экологик меъёрларга жавоб бермайдиган транспорт воситаларининг Тошкентда ҳаракатланиши чекланади. Бу ҳақда Президентнинг жорий йил 2 июнь куни имзоланган ПҚ-171-сонли қарорида белгилаб қўйилди.
Мазкур ҳужжатга кўра, пойтахтнинг 4 та кириш йўл патруль масканларида доимий экологик постлар ташкил этилади.
Яъни, тун-у кун ишлайдиган постлар:
- Учқаҳрамон;
- Эркин;
- Шарқ;
- Бектемир.
Шунингдек, Тошкентда "N-2" (юк ташиш қуввати – 3,5-12,0 тонна) ва "N-3" (юк ташиш қуввати 12,0 тонна) тоифасига кирувчи транспорт воситаларининг ҳаракати тартибга солинади. Бунда ўрнатилган стандартларга жавоб бермайдиган транспорт воситаларини кичик автомобиль ҳалқа йўли орқали ҳаракатланиши таъминланади.
