Яқинда Соғлиқни сақлаш вазирлиги томонидан белгиланган талабларни бажармай, қатор манзилларда ноқонуний фаолиятини давом эттириб келган “Intermed Innovation” МЧЖнинг лицензияси бекор қилингани ҳақида хабар бергандик.
Шундан сўнг МЧЖга алоқадор манбалар интернет сайтлари орқали ССВнинг айбловлари умуман асоссиз эканлигини маълум қилишган.
ССВ мазкур важларга Тошкент шаҳар иқтисодий ишлар бўйича судлов ҳайъати апелляция инстанциясининг суд мажлисида ҳуқуқий баҳо берилгани ҳамда суд қарорида бу ҳақда аниқ тўхтам ҳамда ечимлар акс эттирилганини маълум қилди.
Соғлиқни сақлаш вазирлиги аутсорсинг ёки давлат-хусусий шериклик асосида тадбиркорлик субъектларидан тиббий хизматларни сотиб олиш ёхуд тиббий хизмат кўрсатиш учун шартномавий муносабатларга киришишда бу бўйича лицензияга эга бўлиш ёйинки лицензия олиш талабини шартноманинг алоҳида шарти сифатида кўрсатади.
“Intermed Innovation” МЧЖ ва Соғлиқни сақлаш вазирлиги ўртасида 2020 йил 10 февралда тузилган №1-33К-сонли “Тошкент шаҳрида марказлаштирилган клиник-диагностик лаборатория ташкил этиш, жиҳозлар билан таъминлаш ва фаолиятини юритиш ҳақида”ги Концессия шартномасининг (118-120-варақлари) 12-иловасида келтирилган “Уч томонлама операторлик келишувининг асосий шартлари” ҳужжатининг 3-бандида “Операцион компания учун қўйилган асосий талаблардан бири барча зарур бўлган лицензияларни олиш” эканлиги белгилаб қўйилган.
Демак, “Intermed Innovation” МЧЖ тиббий фаолият манзиллари ва уларда жорий қилинган тиббий ихтисосликлар бўйича лицензия олмасдан ёки лицензиясига ўзгартириш киритмасдан Концессия шартномаси ёхуд давлат-хусусий шериклик асосида тиббий фаолиятни амалга ошириши мумкин эмас.
Бироқ МЧЖ Соғлиқни сақлаш вазирлигига хабарнома, эътироз, шикоят шаклларида бир неча марта мурожаат қилиб, янги фаолият манзиллари учун лицензия талаб-шартлари бўйича экспертлик ўрганиш жараёнларидан ўтмаслигини, фаолият манзилларида лицензияланадиган фаолият учун шароит яратилганлиги ҳақидаги маълумотларни тақдим этмаслигини билдириб, жамиятга муқаддам берилган лицензияга у томонидан очилган филиаллар манзиллари ва ихтисосликларни киритиб, лицензияни қайта расмийлаштиришни сўраган", дейлади ССВ муносабатида.
Маълум қилинишича, “Intermed Innovation” МЧЖнинг мурожаатида кўтарилган масала – филиалларда хизматларни тиббий фаолият учун тегишли лицензия олмасдан ёки мавжуд лицензияга ўзгартириш киритмасдан амалга ошириш ҳақидаги сўровига рад жавоби берилган. Бунинг сабаби тиббий фаолият учун лицензия олиш жараёни фаолиятни амалга ошириш жойига нисбатан қатъий лицензия талаб ва шартларини ўз ичига олади.
Маълумот учун: Ўзбекистон Республикаси Вазирлар Маҳкамасининг 2022 йил 21 февралдаги 80-сонли қарори билан тасдиқланган “Махсус электрон тизим орқали айрим фаолият турларини лицензиялаш тартиби тўғрисида ягона Низом”нинг 38-бандига кўра, лицензиялар лицензиатнинг аризасига асосан масъул орган томонидан қуйидаги ҳолларда ўзгартирилиши мумкин:
лицензия асосида амалга ошираётган фаолиятини лицензияланадиган фаолият турининг бошқа кичик тури билан кенгайтиришда;
лицензия асосида фаолият юритаётган юридик шахслар томонидан ташкил этилган филиаллар ва ваколатхоналарнинг ушбу фаолият билан шуғулланишида;
юридик шахс ҳисобланган тадбиркорлик субъектининг фаолиятни амалга ошириш жойи ўзгарганда.
Ушбу банднинг учинчи ва тўртинчи хатбошларида назарда тутилган асослар лицензиат фаолиятини амалга ошириш жойига нисбатан лицензия талаблари ва шартлари паспортларнинг 9-бандида белгиланган тақдирда, лицензияни ўзгартириш тартибида ариза тақдим этилади.
Тиббий фаолият паспортининг 9-бандида тиббий фаолиятини амалга ошириш жойига нисбатан лицензия талаблари ва шартлари белгиланган. Лицензия олиш ёки лицензияга ўзгартириш жараёнида Соғлиқни сақлаш вазирлиги мутахассислари томонидан тиббий фаолият жойи (бино ва хоналари), моддий-техник базаси, тиббий техника ва тиббий жиҳозлари, тиббий ходимлари ўрганилади, экспертиза ўтказилади ҳамда бошқа келишиладиган органлар томонидан тегишли келишувни ёки хулосани тақдим этиш учун объектларнинг жойига чиқиб ўрганиш ўтказилади.
Низомнинг 18-бандига кўра, Келишиладиган органлар томонидан тегишли келишувни ёки хулосани тақдим этиш учун объектларни жойига чиқиб ўрганиши учун лицензия талабгори лицензияловчи ва келишиладиган органларга тегишли шароитларни яратиб бериши керак.
"Шу сабабли, “Intermed Innovation” МЧЖнинг мулкчилик асосида ёки бошқа мулкий ҳуқуқлар бўйича тегишли бўлган, санитария қоидалари, меъёрлари ва гигиеник нормативларга мос бўлган лицензияланган фаолият турини амалга оширишга мўлжалланган хоналар мавжудлиги ҳақидаги лицензия талаб ва шартларига нисбатан эътироз билдириб, ушбу шарт Концессия шартномаси билан қамраб олиниши сабабли унга қўлланилмаслиги лозимлигини билдирган важлари ҳуқуқий асосга эга эмас.
Бундан ташқари, Соғлиқни сақлаш вазирлиги МЧЖни огоҳлантирмасдан ва қарор қабул қилмасдан, операторнинг 2026 йил 18 февралга қадар амал қилувчи № 043023-сонли лицензиясини тўлиқ маҳрум қилиш бўйича судга даъво киритгани ҳақида важ келтирилган.
Жавобгарнинг ушбу эътирози ҳам ҳеч қандай асосга эга эмас ва ҳақиқатдан мутлақо йироқ.
Чунки Соғлиқни сақлаш вазирлиги томонидан давлатга тегишли бўлган оилавий ҳамда кўп тармоқли поликлиникаларда аҳолига тиббий хизмат кўрсатиши учун амалдаги лицензиясига ўзгартириш киритиш лозимлиги юзасидан “Intermed Innovation” МЧЖ ва Тошкент шаҳар Соғлиқни сақлаш бош бошқармасига 24.03.2022 йилда 33-0309/8060-сонли, 12.04.2022 йилда 33-09563-сонли ҳамда 26.04.2022 йилда 33-11230-сонли, 23.08.2022 йилда 33-25109-сонли огоҳлантириш хатлари юборилган", - дейди ССВ.
Қайд этилишича, судга ариза киритилгунга қадар Соғлиқни сақлаш вазирлиги ваколатли орган сифатида “Intermed Innovation” МЧЖ томонидан Тошкент вилояти, Чирчиқ шаҳар, “Шарқ” МФЙ ҳудудида жойлашган 3-сонли оилавий поликлиника биносида лицензиясиз тиббий фаолият олиб борилганлиги учун МЧЖга молиявий жарима белгилаган ва бажарилиши мажбурий бўлган кўрсатмалардан иборат қарор қабул қилган.
Мазкур ҳужжат ижро этиш учун “Intermed Innovation” МЧЖга юборилган. Ўз навбатида, МЧЖ бу қарор талабларини бажармаслигини маълум қилган ҳамда Тошкент туманлараро маъмурий судига вазирликнинг 33-05606-сонли ва 11-05808-сонли қарорларини бекор қилиш ва қонунга хилоф деб топиш тўғрисида ариза киритган.
Тошкент туманлараро судининг шу йил 20 апрелдаги ажрими билан аризачи “Intermed Innovation” МЧЖнинг аризаси бўйича қўзғатилган иш юритишдан тугатилган ва аризачининг талаблари қаноатлантирилмаган.
"Буларнинг барчаси “Intermed Innovation” МЧЖ қабул қилинган қарорлар ҳақида нафақат тўлиқ хабардор, балки мавжуд камчиликларни судга қадар бартараф қилиш учун етарлича вақтга эга бўлганлиги ҳамда огоҳлантирилганлигини сўзсиз исботлайди.
Бундан ташқари, “Intermed Innovation” ўз баёнотида “қўлланган жарима лаборатория стандартлари ёки таҳлил олиш тиббий протоколлар бузилгани учун эмас, Тошкент вилояти Чирчиқ шаҳридаги 3-оилавий поликлиниканинг манзили лицензияга илова қилинмагани учун белгиланган”ини қайд этган.
Аслида эса бу поликлиника манзили 2021 йилдан бошлаб давлат-хусусий шериклик лойиҳаси доирасида Соғлиқни сақлаш вазирининг 2021 йил 24 сентябрдаги буйруғи, Концессия шартномаси ва операторлик битими билан лойиҳага бириктирилган ҳамда унда ишлашга рухсат берилган", дея таъкидланади ССВ хабарида.
Муносабатда Соғлиқни сақлаш вазири ўринбосари Улуғбек Собировга оид важлар ҳам асосга эга эмаслиги айтилади.
Соғлиқни сақлаш вазирлиги Тошкент туманлараро суди ва Тошкент шаҳар суди томонидан қабул қилинган қарорларни қонуний ва адолатли, деб ҳисоблашни маълум қилган.
Шунга кўра, жавобгар “Intermed Innovation” масъулияти чекланган жамияти суд қарорларидан норози бўлган тақдирда юқори турувчи суд инстанцияларига тегишли тартибда мурожаат қилиши мумкинлигини билдирган.
