2023-йилнинг 16 июнь куни Тошкент шаҳрида Ўзбекистон Республикаси Президенти сайловини ўтказиш бўйича МДҲ кузатувчилари миссияси штаб-квартираси раҳбари Евгений Козяк ва Ўзбекистон Республикаси Марказий сайлов комиссияси раиси ўринбосари Бахром Қўчқоров ўртасида учрашув бўлиб ўтди.
Учрашувда сайловга тайёргарлик кўриш ва Миссия фаолиятини ташкил этиш масалалари муҳокама қилинган.
Евгений Козякнинг таъкидлашича, МДҲ кузатувчилари миссияси мамлакатда сайловолди ташвиқоти ўтказилишини мониторинг қилишда ўнинчи бор иштирок этмоқда.
Шунингдек, у бугундан бошлаб Миссия штаб-квартираси ва узоқ муддатли кузатувчилар иш бошлаганини айд этган. Миссия штаби узоқ муддатли ва қисқа муддатли кузатувчилар фаолиятини ташкил этади, уларнинг овоз бериш арафасида ва овоз бериш кунида ишлаш тартибини белгилайди, уларни Ўзбекистон ҳудудлари ўртасида тақсимлайди, брифинг ўтказади.
“Биз сайловолди ташвиқотини кузатамиз, фуқароларнинг сайлов ҳуқуқларини ҳимоя қилишга оид мумкин бўлган мурожаатлари ва аризаларини кўриб чиқишни ўз ичига олган давлат органлари вакиллари билан учрашамиз. Нафақат пойтахтда, балки бутун республикада сайлов жараёни қандай ташкил этилгани билан танишиш учун республика ҳудудларига ҳам ташриф буюрамиз”, — деди МДҲ Кузатувчилар миссияси штаб-квартираси раҳбари.
Ўзбекистон Республикаси Марказий сайлов комиссияси раиси ўринбосари Бахром Қўчқоровнинг маълум қилишича, Ўзбекистонда сайлов ўтказиш учун 14 та сайлов округи ва 10 784 та сайлов участкаси тузилган, яна 56 та сайлов участкаси республиканинг 36 давлатдаги дипломатик ваколатхоналарида очилади. Матбуот маркази фаолияти ҳам йўлга қўйилиб, сайловолди ташвиқотини ёритувчи журналистлар аккредитациядан ўтказилмоқда.
