Қашқадарё вилоятида Иқтисодий жиноятларга қарши курашиш департаментининг Деҳқонобод туман бўлими бошлиғи автоҳалокатга учради. Департамент ахборот хизмати ҳолат юзасидан маълумот берди.
Унга кўра, ҳолат 20 июнь куни соат 16:10 ларда Қашқадарё вилояти, Деҳқонобод тумани Қорашина шаҳарчасида содир бўлган. Термиз—Тошкент халқаро йўлида департаментнинг Деҳқонобод туман бўлими бошлиғи Б.Ғ. ўзига бириктирилган Nexia-3 да ҳаракатланиб келаётган вақтида қарама-қарши йўналишдаги фуқаро Ш.Ф. бошқарувидаги Cobalt билан тўқнашиб, йўл-транспорт ҳодисасига учраган.
Шунингдек, орқа томондан ҳаракатланиб келаётган фуқаро У.Ё. бошқарувидаги Spark ҳам Б.Ғ. бошқарувидаги Nexia-3 автомашинасига келиб урилган.
Мазкур ҳолат юзасидан тегишли суд тиббиёт экспертизалари ҳамда департамент ходимига нисбатан хизмат текшируви тайинланиб, Қашқадарё вилоят прокуратураси томонидан терговга қадар текширув ҳаракатлари ўтказилмоқда.
