Ўзбекистон Республикаси Президентининг 2023 йил 26 майдаги ПФ-79-сон Фармонига мувофиқ, янги ўқув йилидан бошлаб умумий ўрта таълим муассасаларининг бошланғич синфларида информатика фани, хусусан, 1-синфдан “Информатика ва ахборот технологиялари” фани ўқитилиши белгиланган.
Мазкур вазифалар ижросини таъминлаш мақсадида айни вақтда мамлакатимизнинг барча умумтаълим мактабларининг компютер синфхоналарини қайта жиҳозлашга доир хатлов жараёнлари бошланди. Бу ҳақда Мактабгача ва мактаб таълими вазирлиги хабар берди.
Маълум қилинишича, Мактабгача ва мактаб таълими вазирлиги масъул ходимлари томонидан олиб борилаётган ўрганишлар давомида компютер синфхоналарининг моддий-техник базаси кўздан кечирилади.
Якуний хулосалар асосида тегишли мактаблар замонавий компютер жиҳозлари билан тўлиқ таъминланади.
Ҳозирда Тошкент шаҳрида жойлашган мавжуд 335 та мактабда мазкур йўналишга доир кенг хатлов ишлари бошланди.
