Андижонда янги қурилаётган кўп қаватли уй колоннаси қийшиқлиги аниқланди. Қурулиш ва уй-жой коммунал хўжалиги вазирлиги ҳолат бўйича расмий муносабат берди.
“Телеграм м эълон қилинган хабарда қайд этилган ҳолатлар бўйича вилоят Қурилиш ва уй-жой коммунал хўжалиги соҳасида ҳудудий назорат инспекцияси томонидан ўрганиш ишлари олиб борилди”, дейилади хабарда.
Маълум қилинишича, мурожаатда кўрсатилган манзилда қурилаётган обект учун Андижон шаҳар қурилиш бўлимининг 2021 йил 26 мартдаги рухсатномаси билан А.Мусаев кўчаси 3-манзилда жойлашган “Ватан фарзандлари” НТМга тегишли қурилиши тугалланмаган бино иншоотларни бузиб, ўрнига кўп қаватли турар-жой бинолари қуриш учун рухсат берилган бўлиб, бугунги кунда МЧЖ томонидан юқоридаги манзилда қурилиши олиб борилаётган кўп қаватли турар-жой бинолари билан аҳоли хонадонлари оралиқ масофалари 4,0-8,0 метрни ташкил этади.
Кенгаш хулосасида ҳудудий ёнғинга қарши назорат хизмати томонидан юқоридаги лойиҳа ҳужжати талабларга мувофиқ ишлаб чиқилган, деб келишилган. 12 қаватли турар-жой биноси билан якка тартибдаги уй-жой биноси оралиқ масофаси 4.0-8.0 метргача сақланган ҳолда лойиҳаланган ҳамда “ШАРҚ СТРОЙ ЭКСПЕРТ” МЧЖ томонидан экспертиза хулосаси берилган.
Юқоридаги ҳолатлар юзасидан вилоят қурилиш Бош бошқармасига Архитектура ва шаҳарсозлик кенгаши ишчи органининг 2021-йил 5-июлдаги хулосаси нотўғри берилганлиги сабабли 2022-йил 10-август куни инспекция томонидан тақдимнома (камчиликларга йўл қўйган масъулларга белгиланган тартибда чора кўриш, лойиҳа ташкилотини лицензиясини бекор қилиш ҳамда берилган АШК хулосасини бекор қилиш) киритилган.
Бош бошқарма ҳудудий инспекциянинг тақдимномасига 2022 йил 23 август куни йўллаган жавоб хатида обект қурилишини инспекция томонидан вақтинчалик тўхтатиб туриш лозимлиги ва йўл қўйилган камчиликлар юзасидан лойиҳа ташкилоти раҳбаридан тушунтириш хати олинганлигини билдирган.
Инспекция томонидан ўтказилган назорат ишлари давомида мазкур кўп қаватли турар-жой биносининг Б-блоги 3-қавати “1-Г” ўқидаги юк кўтарувчи устун (колонна) конструкциясининг вертикалликдан 50-70 мм га оғганлик ҳолати ҳам аниқланган.
Ҳолат юзасидан инспекция томонидан 2023 йилнинг 23 июнида қурилишни тўхтатиш тўғрисида ёзма кўрсатма берилиб, қурилиш ишлари тўхтатилган.
Обектда аниқланган қоидабузарликлар юзасидан буюртмачининг техник назорати, лойиҳачининг муаллифлик ҳамда пудратчининг ички назорати ходимларига Маъмурий жавобгарлик тўғрисидаги Кодекснинг 99-моддаси 1-қисми билан маъмурий жарима қўллаш учун ҳужжатлар расмийлаштирилган.
