Қонунчиликка мувофиқ, бир қатор шахсларга автомобил бензини сотиб олиш харажатларининг бир қисми ойлик пул компенсацияси сифатида тўланади. Бу ҳақда "Ўзбекнефтгаз” АЖ Матбуот хизмати хабар бермоқда.
Шу пайтга қадар мазкур тўлов миқдори 75 000 сўмни ташкил этар эди.
Вазирлар Маҳкамасининг қарори билан тасдиқланган “Автомобил бензини сотиб олиш харажатларининг бир қисми учун шахсларнинг айрим тоифаларига ойлик пул компенсацияси тўлаш тартиби тўғрисидаги Низом”га ўзгартиришлар киритилиб, ҳукумат ҳузуридаги Идоралараро тариф комиссиясининг 2023 йил 3 июлдаги қарори билан ушбу турдаги компенсациянинг янги миқдори белгиланди.
Унга кўра, бензин учун компенсация миқдори 2023 йил II чоракдан бошлаб 116 180 сўмни ташкил қилади (55 фоизга ошди).
Компенсация олиш ҳуқуқига эга бўлган шахслар яшаш жойи бўйича пенсия ва нафақалар тайинланадиган органларга мурожаат қилади.
Маълумот ўрнида: Бензин учун компенсация тўловлари "Ўзбекнефтгаз" АЖ томонидан молияшлаштирилади.
06.07.2023 17:36
Айрим тоифадаги шахсларга бензин учун тўланадиган компенсация миқдори оширилди
