17 июл куни соат 13:00 атрофида етти нафар бола (улар орасида 15 ёшли ўзбекистонлик Форидун Мавлонов ҳам бўлган) бошқа бир гуруҳ болалар билан рўбарў келган. Ўсмирлардан бири бошқа бир бола билан жанжаллашмоқчи бўлган. Бу икки гуруҳ талабалар Франклин Делано Рузвелт ўрта мактабига қатнаган ва бир-бирларини таниган. Бу ҳақда АҚШ тергов органи маълумот берган.
Полициянинг таъкидлашича, икки гуруҳ аъзолари жисмоний тарафдан орани очиқ қилишга келишиб олган. Ҳар икки гуруҳ етиб келганида, иккинчи гуруҳ вакили, 17 ёшли йигит қурол чиқариб, кўчанинг нариги томонидаги гуруҳ томон етти марта ўқ узган. Фаридун Мавлонов аниқ мўлжалланган нишон бўлмаган, аммо унга ҳам ўқ теккан.
“Айбланувчи ўзи уруш қилмоқчи бўлган болани отиб ташламоқчи бўлганми ёки етти киши унинг олдига келаётганини кўриб, бу гуруҳ томон ўқ узганми, ҳозирча билмаймиз”, – деди Нью- Йорк полицияси детектив бўлими бошлиғи Жеймс Эссиг.
Мавлонов ўқ узилган жойдан ярим кўча нарида ҳушидан кетган. У оғир аҳволда Маймониддаги тиббиёт марказига етказилган ва 17 июл, сешанба куни вафот этган.
Марҳумнинг қариндошлари ўзбекистонлик муҳожир Фирдавс Мавлонов (марҳумнинг отаси) оиласига тасалли бериш учун йиғилишган.
Ўзбекистоннинг АҚШдаги элчихонаси 15 ёшли Фаридун Мавлоновнинг фожиали ўлимидан чуқур қайғуда эканлиги ҳамда унинг оиласини қўллаб-қувватлашга тайёрлигини билдирган. Таъкидланишича, элчихона ҳамда Нью-йоркдаги Бош консуллик маҳаллий ҳокимият органлари билан доимий алоқада бўлиб турибди.
