Тошкентда фуқаролардан ҳали қурилмаган квартиралар учун тўловларни қабул қилиб олган фирманинг ваъда қилинган ҳудудда турар жой мажмуаси қуришга рухсати бўлмагани ва бунинг ортида аҳолида норозилик юзага келгани ҳақида хабар берган эдик.
Бугун, 21 июль куни Бош вазир Абдулла Арипов Президент топшириғи билан Тошкент шаҳридаги қурувчи фирмаларнинг бирига уй учун тўлов қилиб алданган фуқаролар билан учрашди. Бу ҳақда Бош вазир Матбуот хизмати хабар бермоқда.
Маълум қилинишича, фуқаролар Тошкент шаҳри, Яшнобод тумани, Иззат кўчасида "Азия Инвест Фаворит" МЧЖ томонидан қурилиши режалаштирилган уйларга тўлов қилган, бироқ орадан бир ярим йилдан кўпроқ вақт ўтганига қарамай қурилиш ишлари бошланмаган.
Фуқаролар МЧЖ раҳбари қамоққа олингани билганидан сўнг пулларини сўраб боради, лекин уларга фирма ёпилганини айтиб пулларини қайтариб беришмайди. Фуқаролар кўрган зарар 300 млрд сўмдан ортиқ экани айтилмоқда.
Сайёр қабулда мазкур масалани ўрганиш ва ҳал этиш бўйича тузилган Ҳукумат комиссияси томонидан олиб борилаётган ишлар ҳақида батафсил маълумот берилган. Шунингдек вазир, фуқаролар билан учрашувда, "Уй билан муаммо бўлган 1091 фуқаронинг масаласи ҳал бўлишига мана мен туриб бераман. Бир гапни айтаман, ҳали шу ёшимгача ҳеч кимни алдаб кетганим йўқ", дея ваъда берди.
Шунингдек, қабул якунида улар билан навбатдаги якуний учрашув жорий йил август ойининг биринчи ўн кунлигида ўтказилиши маълум қилинган.
