Фуқароларнинг 119,7 млн сўмлик солиқ тўловларини қўлга киритган ДСИ масъул шахслари аниқланди, дея хабар бермоқда Бош прокуратура ҳузуридаги Департамент.
Департаментнинг Беруний туман бўлими томонидан фуқароларнинг ҳуқуқ ва манфаатларини ҳимоя қилиш юзасидан ўтказилган терговга қадар текширувда туман ДСИ масъул шахслари 86 нафар фуқаронинг жисмоний шахсларнинг мол-мулк ва ер солиғи учун тўланган жами 119,7 млн сўмлик солиқ тўловларини банк кассасига кирим қилмасдан, уларга қалбаки чеклар такдим қилиш орқали ушбу маблағларни фирибгарлик йўли билан қўлга киритганликлари аниқланган.
Мазкур ҳолат юзасидан Жиноят кодексининг 168-моддаси (фирибгарлик) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.
