6 та ҳудудда ўқишни кўчириб бериш ва ўқишга киритиб қўйишни ваъда қилган фирибгарлар ушланди

Бош прокуратура ҳузуридаги Департаментнинг Ўртачирчиқ туман бўлими томонидан ИИБ ходимлари билан ҳамкорликда ўтказилгани хабар қилинмоқда. Унга кўра, тезкор тадбирда фуқаро У.И. фуқаро А.С.ни танишлари ёрдамида Алфраганус университетига ўқишга киритиб қўйиш эвазига 4 000 АҚШ долларини олган вақтида ашёвий далиллар билан ушланган.

Шу каби, Департаментнинг Янгиҳаёт туман бўлими томонидан ДХХ ходимлари билан ҳамкорликда ўтказилган тадбирда фуқаро И.М. фуқаро У.П.га танишлари ёрдамида қўшни Қозоғистон Республикаси университетларидан бирида таҳсил олаётганлиги тўғрисидаги ҳужжат тайёрлаб, унинг ўқишини Қарши шаҳар иновацион таълим университетига кўчиртириб бериши эвазига 1 500 АҚШ долларини олган вақтида ёшвий далиллар билан ушланган.

Худди шундай, Департаментнинг Учтепа туман бўлими томонидан ДХХ ва ИИВ ходимлари билан ҳамкорликда ўтказилган тезкор тадбирда, фуқаро З.Т. фуқаро У.П.га танишлари ёрдамида 15 млн сўм ва 600 АҚШ доллари эвазига қўшни Қирғизистон Республикасидаги тиббиёт университетида таҳсил олаётганлиги тўғрисида ҳужжат тайёрлаб, унинг ўқишини Алфраганус институтининг 3-босқичига кўчиртириб беришини айтиб, олдиндан 600 АҚШ долларини олган вақтида ёшвий далиллар билан ушланган.

Шу каби, Департаментнинг Қўшработ туман бўлими томонидан ДХХ  ва ИИБ ходимлари билан ҳамкорликда ўтказилган тезкор тадбирда Абу али ибн Сино номидаги Сиёб тиббиёт коллежининг бўлим бошлиғи Ў.О. фуқаро М.Э.нинг ишончига кириб, унинг 2 нафар жиянини ушбу коллежга ўқишга киритиб қўйиш эвазига 1 100 АҚШ долларини олган вақтида ашёвий далиллар билан ушланган.

Шунингдек, Департаментнинг Денов туман бўлими томонидан ИИБ ходимлари билан ҳамкорликда ўтказилган тезкор тадбирда Шўрчи Абу Али Ибн Сино номидаги жамоат саломатлиги техникуми ўқитувчиси С.О. фуқаро Д.И.ни юқори лавозимда ишловчи танишлари ёрдамида ушбу техникумга ўқишга киритиб қўйиш эвазига 8,1 млн сўмни олган вақтида ашёвий далиллар билан ушланган.

Департамент ҳамда ДХХнинг Жиззах вилояти бошқармалари томонидан ўтказилган тезкор тадбирда эса, Жиззах шаҳридаги Sambhram университети тьютори Ғ.Ў. фуқаро Ш.К.ни ушбу университетга ўқишга киритиб қўйиш эвазига 400 АҚШ долларини олган вақтида ашёвий далиллар билан ушланган.

Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.