Фарғонанинг икки туманида заҳарланиш ҳолати қайд этилди. Бу ҳақда “darakchi.uz”га Бош прокуратура матбуот хизмати хабар қилди.
Маълум қилинишича, кеча, 5 сентябрь куни Қўштепа туманида яшовчи 2 нафар фуқаро номаълум моддадан заҳарланиш оқибатида соғлиғи ёмонлашиб, туман тиббиёт бирлашмасига олиб келинган.
Шунингдек, шу куни Олтиариқ туманида яшовчи 5 нафар фуқаро ҳам номаълум моддадан заҳарланиб, туман тиббиёт бирлашмасига мурожаат қилган.
Терговга қадар текширув давомида Қўштепа туманида яшовчи фуқаро А.Д. бир гуруҳ шахслар билан тил бириктириб, ўтказиш мақсадини кўзлаб, қўлбола усулда алкоголли маҳсулотлар тайёрлаб, ушбу маҳсулотларга “АКТАУ” ва “КАРАТАУ” номли савдо белгили ёрлиқларни ёпиштириб, умумий овқатланиш шаҳобчаси ва бир оилавий корхонасига ушбу алкоголь маҳсулотини сотганлиги аниқланган.
Мазкур ҳолат юзасидан ЖКнинг 186- ва 186-1-моддалари билан жиноят иши қўзғатилиб, гумон қилинувчи А.Д.процессуал тартибда ушланди.
Тергов давом этмокда.
