Қирғизистонда бурқа кийиш тақиқланиши керак, деди депутат Шарапат Мажитова, бу борада Ўзбекистонни мисол қилиб келтирар экан. Бу ҳақда "Спутник Қирғизистон" хабар қилмоқда.
Унинг сўзларига кўра, сўнгги пайтларда бундай кийим киядиган аёллар сони кўпайган.
"Рўмол ўрашга қарши эмасман, ҳамма рўмол ўрасин. Лекин юзни беркитувчи, шахсни аниқлашга имкон бермайдиган кийим кийиш мамлакат хавфсизлигига зарар этказиши мумкин. Давлат чораларини кўриш вақти келди", - деди депутат.
Эслатиб ўтамиз, сал аввал Ўзбекистон Қонунчилик палатаси депутатлари Жиноят ва Маъмурий жавобгарлик тўғрисидаги кодексларига ўзгартириш ва қўшимчалар киритишга оид қонунни кўриб чиқди. Унга кўра, жамоат жойларида шахсини идентификация қилиш имконини бермайдиган даражада юзини тўсган ҳолда бўлганлик учун — маъмурий жавобгарлик белгиланмоқда. Депутат Алишер Қодиров Қонун лойиҳасида акс этган тақиқ муҳокамаларга сабаб бўлгач, ушбу тартиб нима учун муҳимлигини тушунтирган эди.
