Шимолий Корея етакчиси Ким Чен Иннинг Россияга ташрифи доирасида делегациялар ўртасида музокаралар ўтказиш ва Россия президенти Владимир Путин билан шахсий учрашув режалаштирилган, деди президент матбуот котиби Дмитрий Песков "Россия" телеканалига берган интервьюсида.
Журналист ундан Путин ва Ким Чен Ин учрашуви қачон ва қандай шароитда бўлишини сўради.
“Бу кунларнинг бирида содир бўлиши мумкин. Бу кенг кўламли ташриф - делегациялар ўртасидаги музокаралар бўлади. Шундан сўнг, агар керак бўлса, етакчилар суҳбатни яккама-якка давом эттиради”, — деб жавоб берди Песков.
Матбуот котибининг қўшимча қилишича, КХДРдан келган меҳмон шарафига Россия президенти номидан расмий кечки овқат ҳам режалаштирилган.
Дмитрий Песков режалаштирилган музокараларнинг аниқ санасига аниқлик киритмади. Учрашув қаерда бўлади, деган саволга у шундай жавоб берди: “Биз ҳали гаплашмаяпмиз. Узоқ Шарқда. Учрашувдан кейинги матбуот анжумани режалаштирилмаган".
Песков музокаралар мазмунига тўхталар экан, Россия томони, агар керак бўлса, Шимолий Кореяга нисбатан БМТ Хавфсизлик кенгашининг санкция режимини ҳамкорлари билан муҳокама қилишга тайёрлигини таъкидлади. “Биз Шимолий Корея билан қўшни ва ҳамкор бўлган ҳолда (БМТ Хавфсизлик Кенгаши аъзоси сифатида) ўз ҳаракатларимизни мувофиқлаштирамиз”, — дея таъкидлади матбуот котиби.
Дмитрий Песков АҚШнинг КХДРни Россияга қурол сотмаслик ҳақидаги чақириғига ҳам изоҳ берди: “Маълумки, қўшниларимиз, жумладан, Шимолий Корея билан муносабатларимизни амалга оширишда биз учун икки давлатнинг манфаатлари муҳим бўлиб, улар(Вашингтон)нинг огоҳлантиришлари эмас. Бу икки давлатимизнинг манфаатларига эътибор қаратамиз”.
Корея марказий ахборот агентлиги хабарига кўра, Ким Чен Ин 10 сентябрь куни махсус поездда Пхенянни тарк этган. Россияга сафарида унга Шимолий Корея ҳукуматининг юқори мартабали вакиллари ҳамроҳлик қилмоқда. YTN телеканали унинг Владимир Путин билан учрашуви 13 сентябрь куни бўлиб ўтиши мумкинлигини маълум қилди. Дмитрий Песковнинг аниқлик киритишича, учрашув аввалроқ ОАВ хабар қилганидек, Владивостокдаги Шарқий иқтисодий форум доирасида режалаштирилмаган.
“New York Times” манбаларининг хабар беришича, Россия томони етакчилар ўртасидаги музокаралар натижасида артиллерия снарядлари ва танкга қарши ракеталарни олмоқчи, КХДР эса Россиядан сунъий йўлдошлар ва ядровий сув ости кемалари учун илғор технологияларни тақдим этишини хоҳлайди.
Эслатиб ўтамиз, сал аввал Шимолий Корея етакчиси Ким Чен Иннинг зирҳли поездида Пхеньяндан Россияга бориши хабар қилинган эди.
