Ҳиндистон жанубида, Керала штатида камдан-кам учрайдиган ва ҳалокатли Нипаҳ вируси тарқалмоқда, деб ёзади "Комерсант".
У ерда аллақачон икки киши вафот этган, мактаблар ва идоралар ёпилган, жамоат транспорти тўхтатилган ва инфекция тарқалишининг олдини олиш учун юзлаб одамлар синовдан ўтказилмоқда. Нипаҳ вируси парамиксовируслар оиласига мансуб бўлиб, мевали кўршапалаклар оиласи вакиллари томонидан юқади. Бу нисбатан янги вирус бўлиб, жиддий касалликни келтириб чиқаради, унинг ўлим даражаси анча юқори - юқтирганларнинг 50-75 фоизи вафот этади. Бу миянинг яллиғланишини (энцефалит) ва нафас олиш касалликларини қўзғатади. Вирус биринчи марта 1999 йилда Малайзиядаги чўчқа фермерлари орасида оммавий касаллик пайтида аниқланган. Ўшандан бери 10 дан ортиқ эпидемиялар қайд этилган, барчаси Осиёда. Вирус одамларга касал ҳайвонлардан ҳам, улар тегиб кетган овқатдан ҳам, касал одам билан алоқа қилиш орқали ҳам юқиши мумкин. Инфекциянинг биринчи аломатлари орасида бош оғриғи, уйқучанлик, кейин баъзи ҳолларда ўткир респиратор синдром ва миянинг яллиғланиши ривожланади. Кўпинча бемор комага тушади. Ушбу вирусга қарши вакцина ҳали мавжуд эмас, беморларга қўллаб-қувватловчи терапия кўрсатилади.
