Жорий йилнинг октябрь ойи қуруқ ва ўртача иссиқ ҳаво билан бошланади. Ойнинг биринчи ҳафтасида ёғингарчиликсиз об-ҳаво ҳукмрон бўлиши кутилмоқда. Кечаси ва эрталаб ҳаво ҳарорати +11...+16 даражагача бўлганида тетиклантирувчи салқинликни ҳис қиласиз. Кундузи ҳаво ҳарорати +23...+28 даражагача, жанубнинг айрим жойларида +30 даражагача иссиқ бўлади.
Келгусида ой охиригача республика бўйлаб ҳаво ҳарорати кечаси +3...+8 дан +10...+15 даражагача, кундузи эса +13... +18 дан +23...+28 даражагача бўлади. Қорақалпоғистон, Хоразм ва Навоий вилоятлари шимолида ойнинг иккинчи ярмида кечаси ва эрталаб -3...0 даражагача совуқ бўлиши мумкин. Бу ҳароратлар октябрь ойининг иқлим нормасига яқин.
Октябрь ойида биринчи ўн кунлик охирида, иккинчи ва учинчи ўн кунликнинг айрим кунларида ёмғир ёғиши кутилмоқда.
Иқлимий меъёрларга кўра, Ўзбекистон ҳудудининг катта қисмида ёғингарчилик октябрь ойида 4 кундан 8 кунгача, республиканинг энг чекка жанубида 1 кундан 3 кунгача кузатилади. Ёғингарчилик асосан ёмғир кўринишида бўлади, аммо ҳавода кескин совуқ кузатилганда ёмғир қисқа муддатли қорга айланиши мумкин.
Кўп йиллик ўртача тунги ҳаво ҳарорати +6…+11 даражани ташкил қилади, лекин кўпинча октябрь ойида, айниқса ойнинг иккинчи ярмида биринчи кузги совуқ кузатилади. Октябрь ойида кундузги ҳарорат одатда +10...+15 дан +23...+28 даражагача бўлади.
Синоптикларнинг таъкидлашича, баъзида ҳақиқий ҳарорат ёки ёғингарчилик миқдори иқлим нормасидан сезиларли даражада фарқ қилиши мумкин. Масалан, Тошкент шаҳрида бутун 150 йиллик метеорологик кузатишлар тарихида ҳавонинг максимал ҳарорати айрим йилларда +33...+35 даражага етган. Октябрь ойининг мутлақ максимал ҳарорати 37,5 даража, у 1941 йилда кузатилган.
Тошкентда октябрь ойидаги рекорд минимал ҳарорат ўтган аср бошларида -11,2 даражани ташкил қилган. Охирги 30 йил давомида Тошкентда минимал ҳаво ҳарорати -2...-1 даражадан пастга тушмаган.
Охирги 30 йил ичида Ўзбекистон бўйлаб энг ёмғирли ой 2015 йил октябрь ойи бўлган. Ўша йили Тошкент шаҳрида октябрь ойида ёғингарчилик миқдори меъёрдан 3,5 баробар ошиб, икки кун ичида 45 ммга тушиб, октябрь ойидаги меъёрдан қарийб 2 баробар кўп ёғингарчилик бўлган эди.
Айрим йилларда ой учун ёғингарчилик бўлган кунлар сони 2-3 кундан ошмайди, лекин баъзида камдан-кам ҳолларда Тошкентда ёғингарчилик умуман кузатилмаган. Охирги марта бундай ҳолат 2020 йил октябрь ойида кузатилган.
