Адлия вазирлиги Ахборот хизматининг берган хабарига кўра, Адлия органлари ходимлари бугун Сергелида содир бўлган воқеа жойига етиб боришди.
Маълум қилинишича, Тошкент шаҳар Сергели туманида содир бўлган фавқулодда ҳолат юзасидан олиб борилаётган зарурий чора-тадбирларга Адлия органлари ҳам жалб этилган. Хусусан вазирлик ҳузуридаги Х. Сулаймонова номидаги Республика суд экспертиза марказининг 20 нафар экспертлари воқеа содир бўлган жойда ҳолат бўйича тайинланган тегишли суд экспертизалари юзасидан объектларни дастлабки кўздан кечириш, ходиса келиб чиқиш сабабларини ўрганиш, фуқароларнинг мол-мулкларига етказилган зарарлар миқдорларини аниқлаш ишларини олиб бормоқда.
Шунингдек, адлия органларининг масъул ходимлари жабр кўрган аҳоли билан учрашиб, уларга тегишли ҳуқуқий тушунтиришлар бермоқда ҳамда фуқароларнинг яроқсиз ҳолга келган ёки йўқолган шахсий ҳужжатларини тиклашга амалий ёрдам кўрсатишмоқда, дейилади хабарда.
