Арманистон бош вазири Никол Пашинян Озарбайжоннинг янги чегараларини тан олди, унга кўра Қорабоғ мамлакат таркибига кирди. Тегишли ҳужжат Европа сиёсий ҳамжамиятининг Гранада (Испания) шаҳрида бўлиб ўтган саммити доирасида имзоланди.
Европа Иттифоқи сайтида эълон қилинган декларацияга кўра, Озарбайжоннинг майдони ҳозир 86,6 минг квадрат км.ни ташкил этади ва Қорабоғни ўз ичига олади. Арманистоннинг майдони 29 800 квадрат км.ни ташкил қилади. Ҳужжатни Пашиняндан ташқари Европа кенгаши президенти Шарль Мишель, Франция президенти Эммануэл Макрон ва Германия канцлери Олаф Шольц имзолаган. Озарбайжон президенти Илҳом Алиев аввалроқ бу учрашувда иштирок этишдан бош тортган эди.
Эслатиб ўтамиз, Озарбайжоннинг Қорабоғдаги амалиёти 19 сентябрь куни бошланган. Эртаси куни Арманистон назорати остида бўлган республика таслим бўлиб, ҳудуд Озарбайжон назоратига ўтган эди.
