Бугун, 3 ноябрь куни соат 07:57 лар атрофида "Беруний" бекатига кириб келган 33-сонли ҳаракат таркиби, айланма йўлга киришидан олдин метрополитен ходимлари томонидан текширилганда, вагон ичида назоратсиз буюм мавжудлиги аниқланган. Бу ҳақда Тошкент метрополитени хабар қилмоқда.
Маълум қилинишича, йўловчилар ва ҳаракат хавфсизлигини таъминлаш мақсадида, белгиланган йўриқномага асосан, ушбу поезд текширув йўлагига юборилган. Текширув натижалари давомида ушбу назоратсиз буюм йўловчилардан бирининг шахсий буюми эканлиги аниқланган.
Бунинг натижасида эса йўналишдаги поездлар белгиланган жадвалдан бир муддат кечиккан ҳолда ҳаракатланган.
"Шу ўринда йўловчилардан метро хизматидан фойдаланишда ўз шахсий буюмларига эътиборли бўлишларини яна бир бор эслатиб ўтамиз. Бу метро поездлари йўналишларда белгиланган жадвалга асосан ҳаракатланиши учун асосий туртки бўлаётганини маълум қиламиз", - дейилади хабарда.
Эслатиб ўтамиз, жорий йилнинг 27 октябр санаси соат 19:10 лар атрофида "Технопарк" бекатига кириб келган 83-сонли ҳаракат таркиби метрополитен ходимлари томонидан текширилганда, йўловчилардан бирининг шахсий буюми қолиб кетгани ва бунинг натижасида поезд ҳаракати кечиккан эди.
