Аввалроқ, кечаги ёмғирдан сўнг Тошкент марказидаги янги "дом"нинг ери чўкиб, таги очилиб қолгани ҳақида хабар берган эдик. Darakchi.uz'нинг мазкур хабарига беэътибор бўлмаган Қурилиш ва уй-жой коммунал хўжалиги вазирлигининг масъуллари ҳолатни жойига чиқиб ўрганишди ва қуйидагиларни маълум қилишди:
Тошкент шаҳар Қурилиш ва уй-жой коммунал хўжалиги соҳасида ҳудудий назорат қилиш инспекцияси Шайхонтоҳур тумани Гулобод кўчаси 234-уй манзилидаги қурилиш обекти бўйича ижтимоий тармоқларда тарқалган ҳолат юзасидан шуни маълум қиламизки, айни пайтда мазкур обектда қурилиш-монтаж ишлари тўлиқ якунланмаган. Бино ва иншоотларни фойдаланишга қабул қилиш далолатномаси ҳам расмийлаштирилмаган.
Бинонинг отмостка қисмидаги қурилиш-монтаж ишлари тўлиқ якунланмаганлиги боис, ёмғир оқова сувлари бинонинг пойдевор қисмини ҳимоя қилиб турувчи зичлаштрилган тупроқ ичига тушган ва шу сабабли айрим жойларида отмостканинг чўкиш ҳолатлари юзага келган. Ҳозирда ушбу камчиликлар қурувчи ташкилот томонидан бартараф этилмоқда.
Шунингдек, ҳозирда ҳудудий назорат қилиш инспекцияси мутахассислари мазкур қурилиш обектида қурилиш-монтаж ишлари сифати устидан назорат ишларини олиб боришмоқда.
Маълумот ўрнида айтиш лозимки, мазкур обект Ўзбекистон Республикаси Президентининг 2018 йил 15августдаги “Тошкент шаҳрида инвестиция муҳитини яхшилаш бўйича экспериментни амалга ошириш чора тадбирлари тўғрисида”ги ПФ-5511-сонли фармони ва Тошкент шаҳар ҳокимининг 2019 йил 23 августдаги 1164-сонли қарорига асосан “РОАФ АРТ ҲОУСЕ” МЧЖга Шайхонтоҳур тумани Гулобод кўчаси 234-уй ҳудудида кўп қаватли турар-жой комплексини қуриш учун майдони 0.45 гектарли ер участкаси бўйича захиралаш ҳамда лойиҳа-смета ҳужжатларини ишлаб чиқишга рухсат берилган.
Тошкент шаҳар Қурилиш бош бошқармаси томонидан 2019 йил 16 сентябрда Архитектура режалаштириш топшириғи ишлаб чиқилган ҳамда 2020-йил 2-июлда эскиз лойиҳаси ҳам тайёрланган. Лойиҳа-смета ҳужжатларини келишиш бўйича Архитектура ва шаҳарсозлик кенгаши ишчи органининг тегишли хулосаси билан тасдиқланган ва келишилган, дейилади билдирилган расмий муносабатда.
