Кеча хабар берганимиздек, Тошкентда жадидчилик ҳаракати ва ғояларига бағишланган конференция бўлиб ўтмоқда.
Тадбир доирасида юртимизга келган Туркистон ва Озарбайжонни ўрганиш маркази (Нидерландия) раҳбари Меҳмет Тутунчу конференциянинг аҳамияти ҳақида гапирди.
”Туркий халқларнинг илк ўрта асрлардан то бугунги кунимизгача бўлган тарихий йўлини харитага жойлаштирдик. У ерда жадидлар фаолияти ҳам яққол акс этган. Бундай нуфузли конференцияда қатнашаётганимдан ва ушбу харитани иштирокчиларга тақдимот қилганимдан хурсандман.
Ўзбекистон Президентнинг табрикларини эшитиб, мамнун бўлдим. Биз – неча йиллардан буён Туркия ва Европада яшаб келаётган турклар доим туркий халқларнинг ҳур, мустақил бўлишини орзу қилиб яшадик. Мана, бугун айни шу ерда биз бир пайтлар тақиқ ва таъқиб қилинган фикрлар, шахслар яна ёруғликка чиққанини, қадр топаётганини кўриб турибмиз.
Жадидларнинг эзгу қарашлари бизга умид ва илҳом беради, улар ўлган бўлса ҳам, уларнинг ғоялари ўлмайди, бизнинг мақсадимиз шу ғояларга ҳаёт бахш этиш – Ўзбекистон Президенти ҳам ўз табригида шу жиҳатларга эътибор қаратгани қувонарли”, дейди Меҳмет Тутунчу.
