Жиноят ишлари бўйича Юнусобод тумани судида товламачилик билан боғлиқ жиноят иши кўриб чиқилди. Бу ҳақда darakchi.uz мухбири хабар қилди.
Маълум қилинишича, йигит ўзига авалдан таниш бўлган 21 ёшли қиз билан ишқий муносабатда бўлган. Улар 2023 йил тўйда танишиб қолган. Бир-бирини ёқтириб қолиб, натижада гаплашишни бошлаган.
Бироқ орадан вақт ўтиб, қиз йигит билан орани очиқ қилиш ниятида эканлигини билдирган. Йигит қизнинг беҳаё расмларини тарқатиш билан қўрқитиб, ундан пул талаб қилган.
"Июль ойи бошида 2 млн сўм, кейин 4 млн сўм ва 2 марта 1млн сўмдан берганман. Ишонгандим",- дейди алданган қиз.
Судланувчи жабрланувчининг эҳтиёжлари учун 20 млн сўм сарфлаганини ва у бу пулларни қайтариб олиш учун шу йўлни танлаганини қўшимча қилди. Суд тарафларни эшитиб қарор чиқарди.
Судланувчи ЖКнинг 165-моддаси 2-қисми "а" банди, 141-3-моддаси 1-қисми билан жиноят содир этганликда айбдор деб топилди. Унга нисбатан ЖКнинг 59-61-моддалари тартибида тайинланган жазоларни қисман қўшиш йўли билан 5 йил-у 3 ой муддатга озодликдан маҳрум қилиш жазоси тайинланган.
