Ўзбекистонлик пилла етиштирувчилар даромад солиғидан озод қилинади

ЖАМИЯТ 12.02.2024, 14:40
Ўзбекистонлик пилла етиштирувчилар даромад солиғидан озод қилинади

Президент Шавкат Мирзиёев раислигида бўлиб ўтаётган қишлоқ хўжалиги соҳасига бағишланган видеоселектор йиғилишида айтилишича, Ўзбекистонда 2025 йилдан пилла нархини давлат белгилаши амалиётидан воз кечилади.

Йиғилишда президент ипакчиликни ривожлантиришга алоҳида эътибор қаратиб, тармоқда кескин ўзгариш қилиш зарурлигини таъкидлади. Вьетнам ва Хитой тажрибаси асосида пиллани саноат усулида етиштириш йўлга қўйилади, пилла етиштирувчиларнинг моддий манфаатдорлиги оширилади.

Бунинг учун икки босқичда бозор тамойилларига ўтилади.

Биринчи босқичда 2024 йилда пилла нархи 25 фоизга оширилади. Аҳолига пилла етиштириш учун субсидия берилади ва пилла етиштирувчилар даромад солиғидан озод қилинади.

Иккинчи босқичда эса 2025 йилдан нархни давлат белгилаши, кластерларга туманларни бириктириш, фермер ва касаначилар ўзи етиштирган пиллани фақат кластерларга сотиши амалиётидан воз кечилади.

Яъни, пилла фермер ва кластер ўртасида эркин нархда тузиладиган шартнома асосида ёки биржа орқали сотилади.

Пиллачилик соҳасини ривожлантириш бўйича мутасаддиларга қатор топшириқлар берилди. Жумладан, ипак қуртини хонадонларга тарқатиб, ўрма тутзор ташкил этиш ва уй шароитида тайёр ипак ишлаб чиқаришни рағбатлантириш бўйича тизим яратилади. Озуқа-ем базасини кўпайтириш учун бу йил далалар атрофида 150 миллион янги навли ҳосилдор тут кўчатини экиш топширилди.

Ипакчилик институти ҳузурида иккита наслли уруғлик станцияси ишга туширилади. Институтга хитойлик мутахассислар таклиф қилиниб, наслли ипак қурти зотларини яратиш бошланади.

Шарҳлар

Об-ҳаво: Тошкент
Валюта курси
1