Таshkent Index бозорида автотураргоҳларнинг том қисми машиналар устига қулаб тушди. Бу ҳақда бозор маъмурияти хабар берди.
Қайд этилишича, 16 февраль куни об-ҳавонинг кескин ёмонлашуви ва кучли қор ёғиши оқибатида Таshkent Index кўп тармоқли савдо-сотиқ бозори ҳудудидаги савдо майдонларининг бир қисмида, битта пудратчи томонидан қурилган енгил конструкция (соябон)нинг 50 метрлик қатори қор оғирлигидан қулаб тушган.
Ушбу соябон остида 35 автотранспорт воситаси турган бўлиб, улардан 6 тасининг капот, том, ёки бампер қисмларига шикаст етган.
“Айни вақтда автотранспорт воситаларининг эгалари билан келишилган ҳолда, етказилган моддий зарарни қисқа фурсатларда қоплаб бериш чораси кўрилмоқда”, — дейилади хабарда.
