Муҳокамалар порталига "Оилаларни мустаҳкамлаш ва хотин-қизларнинг фаоллигини ошириш бўйича қўшимча чора-тадбирлар белгиланганлиги муносабати билан Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш тўғрисида" қарор лойиҳаси эълон қилинди.
Маълум қилинишича, 2020 йилдан бошлаб йўлга қўйилган "Аёллар дафтари" тизими орқали қарийб 2,5 миллиондан ортиқ хотин-қизларга ижтимоий-иқтисодий, тиббий, ҳуқуқий ва психологик кўмак бериш учун 5,1 триллион сўмдан зиёд маблағ йўналтирилган.
Хотин-қизларни қўллаб-қувватлаш борасида ижтимоий ёрдамни манзилли кўрсатиш, чинакам ижтимоий ёрдамга муҳтож хотин-қизларни аниқлашда қатор камчиликлар вужудга келган. Жумладан, масъул ташкилотларни чалғитиш орқали турмуш ўртоғи билан никоҳини бекор қилдирган шахсларга ижтимоий ёрдам олиб келаётганлиги натижасида уй-жойга эга бўлиш, касб-ҳунарли бўлиш, иқтисодий аҳволини яхшилашга эҳтиёжманд хотин-қизларнинг оворагарчилиги ва сарсонгарчилигига сабаб бўлмоқда.
Юқоридагилардан келиб чиқиб ҳамда Президентнинг “Оила ва хотин-қизлар қўмитасининг фаолиятини такомиллаштиришга оид қўшимча чора-тадбирлар тўғрисида”ги Фармони ҳамда “Оилаларни мустаҳкамлаш ва хотин-қизларнинг фаоллигини ошириш бўйича қўшимча чора-тадбирлар тўғрисида”ги қарорига ўзгартириш ва қўшимчалар киритилмоқда.
Хусусан, "Аёллар дафтари"ни юритиш орқали хотин-қизлар муаммоларини тизимли равишда ҳал этиш ва уларни ижтимоий қўллаб-қувватлаш тартиби тўғрисида низомнинг тегишли бандига хатлов давомида комиссия томонидан ижтимоий ёрдам олиш учун никоҳи бекор бўлган аёлнинг умумий рўзғор асосида эр-хотин бўлиб яшаётганлиги аниқланса, масъул ташкилотларни чалғитиш деб ҳисобланиб, "Аёллар дафтари"га киритиш рад этиш белгиланмоқда.
