Тошкент туманида инспектор пичоқланди

Ижтимоий тармоқларда "Тошкент туманида профилактика инспектори пичоқлаб кетилди" изоҳи билан хабарлар тарқалмоқда

Тошкент вилояти ИИББ Матбуот котиби ҳолат тармоқларда бироз бошқачароқ талқин қилинаётганини маълум қилди. Айтилишича, аслида инспектор хизмат вақтида жароҳат олган.

Кеча 8 апрель соат 21:10ларда Тошкент тумани Қорасарой МФЙда яшовчи, 1968 й.т. фуқаро Қ.Ж. маст ҳолда уйида жанжал қилаётганлиги сабабли, шошилинч чақирувга асосан воқеа жойига етиб борган туман ИИБ профилактика катта инспектори подполковник Мурод Халиқов, 56 ёшли фуқарони тинчлантираётганида у фаол қаршилик кўрсатиб, қўлидаги пичоқ билан инспекторнинг чап бел қисмига уриб жароҳат етказган.

Натижада тунги хизмат вақтида жароҳат олган профилактика инспектори ИИВ Марказий госпиталига ётқизилган. Фуқаро процессуал тартибда ушланган ва дастлабки терговга қадар текширув ҳаракатлари прокуратура органлари томонидан олиб борилмоқда.