1

Бухорода 50 дан ортиқ одам овқатдан заҳарланди

ЖАМИЯТ 13.04.2024, 21:26
Бухорода 50 дан ортиқ одам овқатдан заҳарланди

Бухоро вилоятида ўтказилган тўй маросимида 50 дан ошиқ одам овқатдан заҳарланган. Бу ҳақда вилоят Соғлиқни сақлаш бошқармаси хабар бермоқда

2024 йил 12 апрел куни соат 22:00 ларда Бухоро туман марказий шифохонасига қоринда оғриқ, кўнгил айниши, қусиш ва умумий ҳолсизлик билан беморлар мурожаат қила бошлаган.

Анамнезда барча беморлар Бухоро туманида жойлашган тўйхонада овқат истеъмол қилиш натижасида ушбу шикоятлар келиб чиққанини билдиришган.

Зудлик билан Бухоро туман марказий шифохонасига барча врачлар сафарбар этилган. Шунингдек, вилоят юқумли касалликлар шифохонасидан ҳам тегишли мутахассислар жалб этилди ва мурожаат қилганлар тўлиқ кўрикдан ўтказилган.

Барча беморларга “Ўткир диарея, гастритик ва гастроэнтеритик шакли, ўрта оғирликда кечиши. Овқатдан заҳарланиш” ташхиси қўйилган ва тегишли инфузион терапия бошланган.

Бухоро туман марказий шифохонасига кеч соат 03:00 га қадар жами 16 нафар бемор (4 нафар болалар, 12 нафар катта ёшдагилар) мурожаат қилган.

Бундан ташқари, Вобкент туман тиббиёт бирлашмасига қарашли марказий шифохонага ҳам худди юқоридаги шикоятлар билан жами 37 нафар бемор (9 нафар бола ва 28 нафар катталар) мурожаат қилган.

Уларга ҳам “Ўткир диарея, гастритик ва гастроэнтеритик шакли, ўрта оғирликда кечиши. Овқатдан заҳарланиш” ташхиси қўйилиб, юқори малакали мутахассислар томонидан консултация ўтказилиб, инфузион терапия бошланган.

13 апрел эрталаб соат 09:00 ҳолатида Бухоро туманида даволанаётган 11 нафар бемор ва Вобкент туманидан даволанаётган 32 нафар беморнинг аҳволи яхшиланиб, қониқарли аҳволда уйига жавоб берилган.

Қайд этилишича, қолган беморлар ҳам аҳволи яхшилангач уйига жавоб берилади. Тиббиёт бригадалари томонидан тўйда қатнашган меҳмонлар аҳволи ҳудудлар кесимида назоратга олинган.      

 

Шарҳлар

Об-ҳаво: Тошкент
Валюта курси
1