Каттақўрғонда ички ишлар ходимларига фаол қаршилик кўрсатган шахсларга нисбатан жиноят иши қўзғатилиб, қамоққа олинди. Бу ҳақда darakchi.uz’га Самарқанд вилояти ИИБ матбуот хизмати хабар қилди.
Маълум қилинишича, жорий йилнинг 11 май куни Каттақўрғон шаҳар “Зарафшон” маҳалласида жойлашган ошхоналарнинг бирида жанжал бўлаётганлиги тўғрисида ИИБга хабар келиб тушади. Жанжал бўлаётган ҳудудга зудилк билан шаҳар ички ишлар бўлимининг 3 нафар профилактика инспекторлари етиб боришади.
4 нафар ёш йигит ўта кучли мастлик ҳолатида ошхона эгалари билан еган таомини пулини туламаслик учун жанжал қилиб, ошхона эгаси бўлган аёлни ҳақорат қилишади.
Жанжалга чек қўйиш мақсадида ходимлар аралашиб, йигитларни тинчлантирмоқчи бўлишганда шоввозлар ходимларга фаол қаршилик кўрсатиб, уларга куч ишлатишади.
Вазиятдан қутилиб қолмоқчи бўлган йигитлардан бири шеригининг “Кобальт” русумли автомашинаси бошқарувига ўтириб капитан Мақсуд Раджабовнинг устига қасддан ҳайдаб уни туртиб юборган.
Барча шахслар қўлга олинган. Ҳозирда мазкур ҳолат юзасидан Каттақўрғон шаҳар прокуратураси томонидан Ўзб.Рес. ЖКнинг 219-моддаси билан жиноят иши қўзғатилиб, гумонланувчилар процессуал тартибда қамоққа олинган, терговга ҳаракатлари олиб борилмоқда.
