Саудия Арабистонида Маккага Ҳаж сафари чоғида ҳалок бўлган зиёратчилар сони 1,3 мингдан ошди, деб хабар берди соғлиқни сақлаш вазири Фаҳд бин Абдел Раҳмон ал-Жалажел. Марҳумлар Маккада дафн этилади.
Илгари 1 мингга яқин ўлим маълум эди.
“Ҳаж вақтида ҳалок бўлганлар сони 1301 нафарни ташкил этди, 83 фоизида тегишли виза бўлмаган”, — деди вазир. Виза Саудия Арабистони расмийлари томонидан Ҳаж йўналиши бўйлаб тақдим этилган кондиционер қурилмалардан фойдаланиш имконини беради.
95 нафар зиёратчи шифохоналарда даволанмоқда, уларнинг бир қисми Ар-Риёдга олиб кетилди. Ўлганларнинг шахсини аниқлаш жараёни кечиктирилди, чунки кўпчиликда ҳужжатлар йўқ эди.
Кўп ҳолларда ўлим ҳаддан ташқари иссиқлик туфайли сувсизланиш ва жисмоний чарчоқ туфайли содир бўлган, деди у. Маккада ҳаво ҳарорати +51 даражага етди.
Ҳалок бўлганлар орасида 660 нафар мисрлик ҳам бор. Улардан фақат 31 нафари мамлакатда бўлиш ҳуқуқига эга эди. Миср зиёратчиларга Саудия Арабистонига рухсатсиз боришга ёрдам берган 16 сайёҳлик агентлигининг лицензиясини бекор қилди. Ҳалок бўлганлар орасида Индонезиядан 165, Ҳиндистондан 98 ва Иордания, Тунис, Марокаш, Жазоир ва Малайзиядан ўнлаб кишилар бор.
2024 йилда 1,83 миллионга яқин зиёратчи Ҳаж зиёратини адо этган бўлса, шундан 1,6 миллион нафари хорижликлардир. Бир йил аввал ҳаж вақтида камида 240 киши ҳалок бўлган эди. 10 минг зиёратчи жазирама туфайли касалликка дуч келди.
